ویب ډیسک
په مکسیکو کې د چارواکو په خبره د موسیقۍ د یوې اووه کسیزې ډلې مړي موندل شوي دي. د دغو کسانو سوځیدلي جسدونه په یوه کوچني بار وړونکي موټر کې موندل شوي دي.
د جمعې په ورځ د مسکیکو د ګوانایواتو ایالت عمومي څارنوال کارلوز زاماریپا، په دغه هیواد کې د موسیقۍ د یوه بانډ د یو شمیر غړو د جسدونو خبر ورکړ.
د معلوماتو له مخې د سیلایا ښار ته نږدې د جان مارتین سیمې پورې اړوند د لوز کوپازیسیو په نامه د موسیقۍ بانډ غوښتل چې د سه شنبې په ورځ په یوه پارټي یا پروګرام کې موسیقي وغږوي. خو دوی هیڅ کله هم دغو مراسمو ته ونه رسیدل. په همدغه شپه د دوی سوځول شوي مړي په یوه پیک اپ ډوله غلا شوي موټر کې دننه وموندل شول.
د دغه هیود د څارنوالۍ د معلوماتو له مخې اوس د قربانیانو د کورنیو غړو د دوی هویت تائید کړی دی. تر اوسه پورې د پيښې د رامنځته کیدو دقیق علت نه معلوم نه دی. د موسیقۍ د دغه بانډ موټر په یوه بل ځای کې په داسې حال کې موندل شوی چې د دغې ډلې د موسیقۍ غږولو آلات یا وسایل په کې نه موجود نه وو.
د مکسیکو په دغه سیمه کې د مخدره موادو د غیر قانوني قاچاق د کنترول په لاس کې نیولو په خاطر د مخدره موادو د قاچاقبرانو د مختلفو بانډونو ترمنځ وخت نا وخت شخړې رامنځته کیږي چې په کې بی ګناه انسانان هم وژل کیږي.
