د افغانستان د پنجشیر ولایت سیمهییز چارواکي وایي، په دغه ولایت کې د کانونو د استخراج د فعالیتونو له پراخېدو سره د «ګرین ګارنټ» په نوم قیمتي ډبره هم د استخراج کېدونکو منرالونو په ډله کې شامله شوې ده.
د چارواکو په خبره، د زمرد او بېروج ترڅنګ اوس د پنجشیر په بېلابېلو سیمو کې د ۱۵ نورو ډولونو قیمتي ډبرو زیرمې هم پېژندل شوې او د استخراج چارې یې روانې دي.
د معلوماتو له مخې، د عنابه ولسوالۍ په اړوندو سیمو کې د ګرین ګارنټ لس کانیزې ساحې تثبیت شوې دي. چارواکي زیاتوي چې په دغو ساحو کې د استخراج عملي بهیر پیل شوی او تمه ده چې د کانونو د سکټور په پراختیا او اقتصادي ودې کې مهم رول ولوبوي.
د افغانستان سیمهییز مسئولین باور لري چې د نوو قیمتي ډبرو استخراج به د پانګونې فرصتونه زیات او د سیمې خلکو ته به د کار زمینه هم برابره کړي.
