ویب ډیسک
کوټه او د بلوچستان په بېلابېلو ښارونو کې د نامعلومو وسله والو له لوري د یو وخت بریدونو راپورونه ورکړل شوي دي۔
د شنبې په سهار په کوټه کې په څلورو بېلابېلو ځایونو کې د ډزو غږونه واورېدل شول۔
په سریاب سړک د پولیسو پر یوه موټر برید وشو او هغه وسوځول شو، چې له امله یې دوه پولیس اهلکاران ووژل شول۔
همداراز، په سریاب سړک پر یوه شخصي موټر ډزې وشوې چې پکې د کسټم دوه اهلکاران سخت ټپیان شول او نږدې روغتون ته لېږدول شوي دي۔
په ختیځ بای پاس او لوېدیځ بای پاس سیمو کې هم د ډزو راپورونه ترلاسه شوي دي۔
سربېره پر دې، په مستونګ، نوشکي، خاران، د چاغي ولسوالۍ دالبندین سیمه، قلات، د ګوادر ولسوالۍ پسني سیمه، او د کیچ ولسوالۍ په بېلابېلو سیمو لکه تربت، تمپ او مند کې د چاودنو او ډزو غږونه اورېدل شوي دي۔
د کیچ ولسوالۍ د تمپ تحصیل په سیمه کې پر پولیس تاڼې د برید راپورونه هم ورکړل شوي دي۔
د دغو بریدونو مسؤلیت ناقانونه ګرځول شوې بلوچ لبریشن آرمي منلی دی۔
له کوټې څخه د لاهور له لارې پېښور ته تلونکې او له هغه ځایه راتلونکې جعفر ایکسپریس، او همداراز له کوټې څخه چمن ته تلونکې او راتلونکې پسنجر رېل ګاډي لغوه کړل شوي دي۔
د ریلوې کنټرول روم سکر د معلوماتو له مخې، له پېښور څخه کوټې ته روانه جعفر ایکسپریس د بلوچستان ته له داخلېدو مخکې په جیکب آباد کې ودرول شوه۔
