د رسمي شمېرو له مخې، د ۲۰۲۵-۲۶ مالي کال په لومړیو لسو میاشتو کې د پاکستان او د منځنۍ اسیا د پنځو هېوادونو ترمنځ سوداګري د پام وړ کمه شوې ده. د افغانستان له لارې د ځمکنۍ سوداګریزې لارې تر تړل کېدو وروسته د پاکستان صادرات او واردات دواړه راټیټ شوي دي.
د راپور له مخې، د قزاقستان، قرغزستان، تاجکستان، ترکمنستان او ازبکستان پر لور د پاکستان صادرات د تېر کال د همدې مودې په پرتله ۸.۶ سلنه کم شوي او نږدې ۱۴۸ میلیونو ډالرو ته رسېدلي دي. همدارنګه له دغو هېوادونو واردات هم شاوخوا ۸۸ سلنه راکم شوي دي.
پخوا د افغانستان له لارې د پاکستان او منځنۍ اسیا ترمنځ کلنۍ سوداګري د ۴۰۰ او ۵۰۰ میلیونو ډالرو ترمنځ وه، خو د دې لارې له تړل کېدو وروسته سوداګریزې راکړې ورکړې اغېزمنې شوې دي.
پاکستان اوس هڅه کوي چې د ایران له لارې منځنۍ اسیا ته توکي ولېږدوي، خو د واټن د اوږدوالي له امله د سوداګرۍ کچه لا هم محدوده پاتې ده.
په سیمه کې یوازې له ازبکستان سره د پاکستان صادرات زیات شوي دي. د ازبکستان پر لور صادرات نږدې ۳۸ سلنه لوړ شوي او له ۶۴ میلیونو ډالرو اوښتي دي.
بلخوا قزاقستان، تاجکستان او ترکمنستان ته د پاکستان صادرات کم شوي دي. تر ټولو لوی کمښت تاجکستان ته په صادراتو کې لیدل شوی، چې له ۶۳ سلنې څخه زیات راټیټ شوي دي.
اقتصادي شنونکي وايي، د افغانستان له لارې د سوداګریزې لارې تړل کېدل د پاکستان او منځنۍ اسیا ترمنځ پر سوداګرۍ مستقیم اغېز کړی او د سوداګرۍ د پخوانۍ کچې بېرته راګرځول به بدیلو او اسانه ترانزیټي لارو ته اړتیا ولري.
