ويب ډيسک
د امریکا نوی منتخب ولسمشر ډونالډ ټرمپ، د کاناډا د لومړي وزیر جسټېن ټروډو د استعفا په غبرګون کې ویلي، کاناډا باید د امریکا یو ایالت شي.
ټرمپ ویلي، اوس د دې کار لپاره مناسب وخت دی چې اقدام وشي.
رویټرز خبري اژانس په یوه راپور کې د ټرمپ له قوله لیکلي: «که کاناډا له امریکا سره یو ځای شي، نو تعرفې به له منځه ولاړې شي، مالیات به راکم شي، او دوی به د روسي او چینايي بېړیو له ګواښونو بشپړ خوندي شي.»
ټرمپ زیاته کړې، چې د کاناډا ډېری خلک دا خوښوي څو هېواد یې د امریکا ۵۱م ایالت شي.
د ټرمپ په وینا امریکا نور هغه لوی سوداګریز کسرونه او اقتصادي ملاتړ چې کاناډا ورته د دوام لپاره اړتیا لري، نشي زغملی.
د کاناډا صدراعظم جسټن ټروډو پرون دوشنبه د لیبرال ګوند له مشرۍ او صدراعظمۍ دواړو نه استعفا ورکړه.
په دې سره کاناډا کې ۹ کلنه واکمني ختمه شوه او د معلوماتو له مخې راتلونکو ټاکنو ته هم بیا ځان نه کاندیدوي.
