د افغانستان اوسني حکومت د کانونو او پټرولیم وزارت ویاند، همایون افغان وایي چې په هرات ولایت کې د ټاپي د ګازو نللیکې پروژې رغنیزې چارې په چټکۍ سره روانې دي او تر دې دمه یې د پام وړ پرمختګ کړی دی.
د همایون افغان په وینا، تر اوسه پورې د هرات په اړونده برخه کې ۴۴ کیلومتره نللیکه په عملي توګه غځول شوې ده. نوموړی زیاتوي چې تخنیکي ټیمونو د پاتې چارو لپاره هم چمتووالی نیولی او د نللیکې د نور غځولو لپاره ۱۲۴ کیلومتره ځمکه (سیمه) په بشپړ ډول چمتو شوې ده.
همایون افغان په خپله رسمي پاڼه کې لیکلي: «د ټاپي د ګازو نللیکې پروژې رغنیزو چارو په هرات ولایت کې د پام وړ پرمختګ کړی»
ټاپي پروژه چې د ترکمنستان ګاز د افغانستان له لارې پاکستان او هند ته لېږدوي، د افغانستان لپاره یوه له مهمو او حیاتي اقتصادي پروژو څخه ګڼل کېږي.
