ويب ډیسک
فرانسوي چارواکو د پاریس ښار له بریا تاق څخه په موقتي توګه لګول شوی د اروپايي ټولنې بیرغ، د يکشنبې په ورځ بیرته لرې کړ.
دغه اقدام وروسته له هغې وشو چې د ولسمشر امانويل ماکرون ښي اړخي مخالفانو هغه د فرانسوي هویت پر «له منځه وړو» باندې تورن کړ.
پاریس د اروپايي اتحاديې آبي رنګه بیرغ د نوي میلادي کال په جشن کې په دې ویاړ پورته کړی وو، چې د اروپايي اتحاديې د شورا د راتلونکو شپږو میاشتو مشري فرانسې ته ورکول کیږي.
د ۲۰۲۲م کال په شپه د پاریس ښار ایفل برج او د پانتیون ودانۍ په څیر نور مهم ځایونه هم د اروپايي اتحاديې پر بیرغ ډيزاین شوې ول.
خو د ماکرون مخالفانو دغه اقدام د فرانسې میراث او پخوانيو سرتیرو ته سپکاوی بللی دی. دا په داسې حال کې ده چې فرانسه په راتلونکي پسرلي کې د ولسمشرۍ انتخابات لري.
محافظه کارې نوماندې، والري پکرس پر ټويټر ليکلي دي: «د اروپا مشري کول هو، د فرانسوي هویت ورکول نه.»
هغې غوښتنه کړې چې بیرته دې د فرانسې بیرغ وځړول شي. پکرس زیاته کړې: «موږ د خپلو سرتيرو چې زموږ له پاره يې خپلې وينې توېې کړي پوروړي یو.»
