ويب ډيسک
د افغانستان مالیې وزارت وايي، چې د بېلابېلو سکتورونو له هر اړخیزې ارزونې وروسته د افغانستان اوسنی اقتصادي وضعیت بېرته عادي حالت ته راګرځېدلی دی.
د دغه وزارت د خبرپاڼې له مخې، د مالي سوداګرۍ، بهرنیو بشري مرستو، د افغانۍ ارزښت او پر اقتصاد د بهرني سیاست د بدلونونو د اغېزو په اړه د دغه وزارت له اقتصادي ارزونې وروسته؛ دا څرګنده شوه چې د وارداتو او صادراتو بهیر له کومې ستونزې پرته په «ښه» حالت کې و، د بانکدارۍ سکتور باثباته و، ملي عواید په شفاف ډول راټول شوي او د سیسټم مهم لګښتونه پرته له کومې رخصتۍ په عادي توګه تادیه شوي.
دغه وزارت د بهرنیو اسعارو په ځانګړي ډول د ډالرو پر وړاندې د افغانیو د ارزښت د ټیټېدو پړه په لویه کچه منفي تبلیغات بولي.
په خبرپاڼه کې راغلي: «په ټولیز ډول د افغانیو د ارزښت د ساتلو ټول کورني اقتصادي عوامل په عادي حالت کې دي.»
