پښتو جرنل
دا پېښه هغه مهال رامنځته شوه کله چې تېره ورځ د زخې خېلو د دربار په سیمه کې د یوه مارټر ګولۍ له امله یوه معصومه نجلۍ شهیده شوه. له دې امله د سیمې خلکو د یکشنبې په سهار د تیراه بریګېډ مرکزي دفتر مخې ته شدید مظاهره پیل کړه، چې وروسته زور واخیست مظاهرهچیان د بریګېډ دننه ننوتل.
شهیدان: د وژل شویو کسانو اکثریت د زخې خېلو قبیلې پورې تړاو لري. نومونه یې: شفیق الله، فرمان الله د خان دوست زوی، جلال د رحمت ګل زوی، اکرام الله د زار بادشاه زوی، نبي جان د اسرار خان زوی.
د ټپیان نومونه: گل رحمان، معراج، نعمت الله، ظاهر شاه، فهیم، یاسر خان، بلال (پلار یې نهدی معلوم)، گل ولي د ابراهیم زوی، عرفان الله د شاهده زوی، زوهیب د احمد ګل زوی، عزیز الله د گل بادشاه زوی، نجیب الله د حضرت عمر زوی، عمران د جمیل زوی، علي شیر د نعمت شاه زوی، رحمان گل د رحمت الله زوی.
د پېښې تفصیل: د معصومې نجلۍ د شهادت وروسته، د قبایلي ولس غصه زیاته شوه او د تیراه بریګېډ مخې ته یې مظاهره وکړه. مظاهره په سولهییز ډول پیل شوه، خو کله چې مظاهرهچیانو د هیډکوارټر احاطې ته ننوتل، نو وضعیت تریخ شو. امنیتي ځواکونو د مظاهرهچیانو د تیت و پرک کولو لپاره هوايي او مستقیم ډزې وکړې، چې له امله یې پنځه کسان شهیدان او پنځلس نور ټپیان شول. همداراز، څو تنه مظاهرهچیان هم ونیول شول، چې له امله یې احتجاج لا پسې شدید شو.
ورانۍ او تاوتریخوالی: مظاهرهچیانو د غبرګون په توګه یوه عارضي روغتیايي مرکز (بی ایچ یو) او یو بلدوزر وسوځاوه. د سیمې وضعیت لا هم کړکېچن دی، او د موبایل شبکې بندښت له امله د پېښې بشپړ معلومات ترلاسه کول ستونزمن شوي دي.
روغتیايي وضعیت: ټپیان د مختلفو روغتونونو لکه مشتي میله (اورکزی)، ایفسي ټیچنګ روغتون (پېښور)، ډوګره روغتون (باړه)، او حیاتاباد میډیکل کمپلکس ته انتقال شوي دي. د ځینو ټپیانو روغتیايي حالت ډېر خراب ښودل شوی.
جرګه او مذاکرات:
د وضعیت د ارامولو لپاره، بریګېډ قوماندان د قبیلوي مشرانو یوه جرګه راوغوښته. په دې جرګه کې قوماندان بخښنه وغوښته او ژمنه یې وکړه چې:
د پېښې د عامل سرتېرو پر ضد به کاروایي کېږي؛ شهیدانو ته به پنځلس لکه معاوضه ورکول کېږي؛ ټپیان به د حکومت له لوري مفت تداوي کېږي؛ بندې لارې به پرانیستل کېږي.
یوشمېر ځوانانو د جرګې له پایلو سره مخالفت ښودلی او ویلي یې دي چې دا بسنه نه کوي.
سیاسي او ولسي غبرګونونه:
د باړې سیاسي اتحاد، د قامي اسمبلۍ غړی اقبال افریدي، او د صوبايي اسمبلۍ غړی عبدالغني افریدي دا پېښه په کلکو ټکو غندلې.
دوی د پېښې سمدستي او شفافې پلټنې، د ذمهدارو پر ضد سزا، د شهیدانو کورنیو ته تاوان، او د نیول شویو مظاهرهچیانو خوشې کولو غوښتنه کړې.
د پاکستان تحریک انصاف (پیټيآی) ضلع خیبر د پېښې پر ضد د باب خیبر مخې ته د عاجل احتجاج اعلان کړی.
د باړې ولس، ځوانان، او مدني ټولنې د ټویټر، فیسبوک، یوټیوب او ټکټاک له لارې د تیراه پېښه غندلې او دا یې ظلم او دولتي تېری بللی دی.
خلکو له د سترې محکمې مشر قاضي او د صوبې له لوړپوړو چارواکو د فوري مداخلې غوښتنه کړې.
