د پښتونخوا ملي عوامي ګوند مشر او د ملي اسمبلۍ د اپوزیسیون مشر محمود خان اڅکزي د سرانان د وروستۍ پېښې په اړه اندېښنه څرګنده کړې او ادعا یې کړې چې د حکومت په دننه کې ځینې کړۍ د دغې پېښې تر شا لاس لري.
اڅکزی د ملي اسمبلۍ غونډې ته په وینا کې وویل، په سرانان کې د تېرو دوو ورځو پېښو ته د چارواکو له لوري کافي پاملرنه نه ده شوې. نوموړي ادعا وکړه چې دغه پېښه د حکومت په دننه کې د موجودو هغو کسانو کار دی چې نوموړي یې «تور پسونه» وبلل.
نوموړي د پاکستان د پخواني لومړي وزیر عمران خان د روغتیا او روغتون ته د لېږد په اړه هم خبرې وکړې. د اڅکزي په وینا، د عمران خان د خور لپاره د روغتون دننه جلا خونه نیول شوې وه او وروسته یې د نوموړي د روغتون د بدلېدو په اړه پوښتنې راپورته کړې.
اڅکزی وویل، په هېواد کې داسې تمه موجوده وه چې عمران خان به د سترې محکمې د پرېکړې له مخې شفا نړیوال روغتون ته ولېږدول شي، خو د ده په خبره، وروسته په ناڅاپي ډول نوموړی بل روغتون ته انتقال شو.
د اپوزیسیون مشر زیاته کړه چې د حکومت په دننه کې ځینې کسان هڅه کوي د تحریک انصاف او حکومت ترمنځ روانې اړیکې او خبرې اترې ګډې وډې کړي.
د اڅکزي دغه څرګندونې په داسې حال کې دي چې نوموړي د سرانان د پېښې د مسوولیت په اړه مستقیمه ادعا کړې، خو په دې اړه په دې بیان کې د حکومت یا اړوندو ادارو رسمي دریځ نه دی وړاندې شوی.