ویب ډیسک
د افغانستان په پلازمېنې کابل، ښار مزار شریف، کندوز او ننګرهار کې په چاودنو او بمي بریدونو کې لسګونه ملکي وګړو او طالبانو ته مرګ ژوبله اوښتې ده.
د اپرېل پر ۲۱مه په مزارشریف ښار کې د اهل تشیع په سه دوکان تاریخي جومات کې د ماسپښین د لمانځه پر مهال درنه چاودنه شوې.
د بلخ د روغتون رییس ډاکتر غوث الدین انوري مشال راډیو ته ویلي چې روغتون ته ۱۰ مړي او تر ۴۰ زیات ټپیان انتقال شوي.
په بلخ کې د طالبانو د حکومت د اطلاعاتو رییس ذبیح الله نوراني ویلي چې په پېښه کې ۲۵ کسانو ته مرګ ژوبله اوښتې خو نور معلومات یې نه دي ورکړي.
اخوا په کندوز کې د طالبانو یو کوسټر ګاډی د چاودنې ښکار شوی دی چې پکې څلور کسان وژل شوي او ۱۹ نور ټپیان دي.
د کندوز د امنيه قوماندانۍ ویاند عبیدالله عابدي د اپرېل پر ۲۱مه مشال راډيو ته تایید کړه چې په وړوکي ښار دورې کې د طالبانو د ۲۱۷ عمري قول اردو د تخنیکي کارکوونکو موټر په نښه شوی دی.
د ننګرهار په خوږیاڼیو ولسوالۍ کې د طالبانو یو رېنجر موټر د سړک غاړې بم ښکار شوی چې پکې له معلوماتو سره سم، څلور طالبان وژل شوي او یو ژوبل دی. خو د طالبانو حکومتي چارواکو دا مرګ ژوبله نه ده تایید کړې.
هلته په کابل کې د طالبانو د امنیه قومندانۍ ویاند خالد ځدراڼ ویلي چې د اپرېل پر ۲۱مه تر غرمې مخکې د ښار په قمبر څلور لاره کې په یوه چاودنه کې دوه ماشومان ژوبل شوي دي.
نوموړي البته د پلازمېنې په کمپنۍ کې د بلې چاودنې رپورټونه رد کړل.
د تازه بریدونو ذمه وارۍ چا نه دي منلې.
دا پېښې پر داسې مهال شوې دي چې د اپرېل پر ۱۹مه د کابل په دشت برچي سيمه کې دوو ښونځیو ته څېرمه په بمي چاودونو کې لږ تر لږه شپږ کسان ووژل او ۲۰ ټپیان شول.
د کابل پر تعلیمي مرکزونو تر ټولو خونړی برید په ۲۰۲۱ز کال کې د طالبانو تر واکمنۍ نېږدې درې میاشتې مخکې شوی وو. په هغه حمله کې لږ تر لږه ۸۵ کسان، چې اکثره يې نجونه وې، وژل شوي او لسګونه نور زخميان ول.
