د خیبر پښتونخوا د لنډي کوتل په حمزه بابا ترانزیټ مرکز کې د اسنادو د تصدیق بهیر له ښه کېدو سره افغانستان ته د افغان کورنیو، چې ډېری یې بې اسناده دي، د ستنېدو لړۍ چټکه شوې ده.
د یاد مرکز سرچینو ویلي، هره ورځ په اوسط ډول شاوخوا څلور زره افغانان په دغه مرکز کې ثبت او تصدیق کېږي او وروسته د تورخم له لارې افغانستان ته لېږدول کېږي.
چارواکو د ګڼې ګوڼې او احتمالي بې نظمۍ د مخنیوي لپاره له افغانانو غوښتي چې د تصدیق لپاره په انفرادي ډول مرکز ته ورشي، په داسې حال کې چې د هغوی د کورنیو سامانونه لېږدوونکي موټر د ګمرکي او امنیتي پلټنو له بشپړېدو وروسته جلا افغانستان ته استول کېږي.
د مرکز یوه مسؤول ویلي، هره ورځ له ۸۰۰ تر ۱۰۰۰ پورې بالغ افغانان، ښځې او نارینه، تصدیق کېږي او له هر یوه سره په اوسط ډول پنځه ماشومان هم مل وي. د نوموړي په وینا، که اسناد سم وي، د تصدیق او تصفیې بهیر شاوخوا ۱۵ دقیقې وخت نیسي، او تر ۱۲ کلونو کم عمره ماشومان له دې پروسې معاف دي.
سرچینې زیاتوي، هغه کسان چې شکمن یا جعلي اسناد ولري، په جدي ډول پوښتل کېږي او د نادرا کارکوونکي یې ټول معلومات او اسناد په دقت ارزوي. همداراز د بې اسناده کسانو د کورنیو له غړو، په ځانګړي ډول له والدینو، سره هم اړیکه نیول کېږي ترڅو د هغوی د قضیې په اړه پرېکړه وشي.
چارواکي ادعا کوي چې د انسانانو د قاچاق یوه منظمه ډله ځینې پاکستانۍ ښځې د فحشا لپاره افغانستان ته لېږدولې. د دوی په خبره، یو شمېر داسې ښځې او د هغوی مرسته کوونکي نیول شوي، ځکه چې د افغان تابعیت د ثابتولو توان یې نه درلود.
د چارواکو په وینا، ډېری ستنېدونکي افغانان په پاکستان کې زېږېدلي، هېڅکله افغانستان ته نه دي تللي او قانوني اسناد هم نه لري. دغه کسان تر ډېره د ۳۰ کلونو څخه کم عمر لري او د بېوزلو کورنیو غړي دي، نو ځکه د راتلونکي په اړه د اندېښنو او محدودو امکاناتو له امله افغانستان ته له تګ زړه نا زړه دي.
چارواکي وایي، د روان کال د مارچ په ۳۱مه د تورخم لارې له بیا پرانیستل کېدو وروسته تر اوسه شاوخوا ۲۰۰ زره افغانان افغانستان ته ستانه شوي دي.
