ویب ډیسک
سي ان ان په خپل یوه تازه راپور کې ویلي کابل هوایي ډګر کې د ۲۰۲۱ کال تخلیې پرمهال وژل شوي ۱۷۰ افغانان ټول د چاودنې له امله نه وو بلکې هلته پر دنده امریکایي پوځیانو هم په دغو وژنو کې برخه لرله.
راپور کې د امریکایي پوځیانو له قوله د نوم نه ښودلو په شرط لیکل شوي، له چاودنې وروسته یې د ډزو ګڼ غږونه اوریدلي چې ډېری یې کابل هوایي ډګر کې د پر دنده امریکایي پوځیانو له لوري څخه وو.
په راپور کې له یو افغان ډاکټر سره هم خبرې شوي چې ویلي یې دي، د پېښې د ګڼو قربانیانو له بدنه یې مرمۍ ایستلي دي.
له دې مخکې د امریکا دفاع وزارت (پنټاګون) هغه ادعاوې رد کړې وې چې ګواکي په دغه پېښه کې دې امریکایي پوځیانو افغان ملکي وګړي په نښه کړي وي.
د ۲۰۲۱کال اګسټ ۲۶مې پېښې په کابل هوایي ډګر کې د تخلیې پرمهال ۱۷۰ افغانان او ۱۳ امریکایي پوځیان وژل شوي وو.
