ويب ډیسک
د طالبانو امنیتي چارواکي وايي له ایران سره په ګډ سرحد کې د طالبانو د وسله والو او ایراني سرتېرو ترمنځ نښته شوې چې په پایله کې یې د رویټرز خبري آژانس د خبر له مخې د افغانستان لوري ته یو تن وژل شوی دی.
آژانس د نیمروز د امنیه قوماندانۍ د ویاند بهرام حقمل له قوله خبر ورکوي چې وايي، د دوی له لوري یو تن وژل شوی او یوټپی دی. بهرام زیاتوي چې د دې نښتې علت تراوسه روښانه نه دی. د ایران نیمه دولتي خبري آژانس فارس د ایران خوا ته د هیرمند د ولسوال میثم برازنده له قوله خبر ورکړی چې نښته درېدلې او تلفات نه لري.
سیمه ایزو سرچینو رویټرز ته ویلي دي چې د افغانستان لوري ته د دې سرحدي سیمې خلک د جګړو پرمهال له خپلو کورونو ووتل. پر افغانستان د طالبانو له واکمنېدو په راوروسته موده کې د طالبانو ځواکونو څو ځلې په ګډ سرحد کې له ایراني پوله ساتو سره نښتې کړې دي. طالبانو همداراز په وار وار د ډیورنډ کرښې په اوږدو کې له پاکستاني پوځیانو سره هم نښتي دي.
