ويب ډیسک
د طالبانو د کورنیو چارو وزارت وایي، په کابل کې د پاسپورت عمومي ریاست مخته د برید مخه نیولې ده.
د کورنیو چارو وزارت مرستیال ویاند عاقل جان عزام نن پنجشنبه ډسمبر ۲۳ (مرغومې دوهمه) رسنیو ته په لېږلو معلوماتو کې ویلي: “نن غرمه مهال یو بریدګر چې غوښتل يې پاسپورټ ریاست ننوځي د پاسپورټ ریاست د نظامي پرسونل له لورې په نښه کړل شو او ووژل شو.”
نوموړي زیاته کړې چې په برید کې چاته تلفات نه دي اوښتي.
تر دا مهاله د کابل پاسپورت ریاست مخته د برید د پلان مسؤلیت کومې وسله والې ډلې نه دی منلی.
د کابل د پاسپورت ریاست مخته پر داسې مهال د برید مخه نیول کیږي چې د یاد ریاست د معلوماتو په اساس نن پنجشنبه په دغه ریاست کې طالبانو او د هغوی د کورنیو غړو ته پاسپورتونه وېشل کېدل.
د یاد ریاست د معلوماتو په اساس د هرې پنجشنبې په ورځو طالبانو او د هغوی کورنیو ته پاسپورتونه ورکول کیږي.
د کابل د پاسپورت ریاست مخته هره ورځ په زرګونو کسان د پاسپورت اخیستلو لپاره راټولیږي چې له امله یې د مراجعینو کنټرول او نظم هم له توانه وتلی وي.
د دغه ریاست مسؤلینو تر دې مخکې هم له مراجعینو څخه غوښتي و چې د خپل نوبت له مخې یاد ریاست په ورتلو سره نظم مراعت کړي.
د پاسپورت ریاست مخته د مراجعینو د منظمولو او امنیت نیولو لپاره ګڼ شمېر طالب سرتیري په دندو ګمارل شوي دي.
د کابل د پاسپورت ریاست میاشت مخکې د تخنیکي ستونزو له امله د مراجعینو پر مخ تړل شوی او تیره یکشنبه بیرته پرانیستل شو.
