ویب ډیسک
د هند حکومت ویلي، چې د ملي امنیت او عامه تګلارو پر بنسټ یې له پاکستانه پر هر ډول وارداتو بندیز لګولی دی.
دا بندیز وروسته له هغې لګول کېږي، چې د پهلګام پېښې وروسته د واګه سوداګریز بندر هم تړل شوی او دواړو هېوادونو د هوايي شرکتونو لپاره خپل فضايي حریمونه تړلي دي.
که څه هم له دې وړاندې د هند او پاکستان ترمنځ سوداګري د لوړې کچې نه وه، خو تازه بندیز به د پاکستان له لارې پر ټولو او د دغه هېواد پر محصولاتو بشپړ اغېز وکړي.
پاکستان د هند د وروستي اقدام غبرګون کې څه نه دي ویلي، خو له دې وړاندې د دواړو هېوادونو ترمنځ وروستي تاوتریخوالي له امله د افغانستان سوداګري هم زیانمنه شوې ده.
د یادونې وړ ده چې هند سره د شخړو په اوج کې تېره اوونۍ پاکستان د افغانستان ۱۵۰ بار لاریو ته اجازه ورکړه چې د واګه بندر له لارې هند ته واوړي.
# #India #Pakistan #Transit
