ویب ډیسک
د طالبانو د صنعت او سوداګرۍ وزارت وايي، تېر لمریز کال له هند سره د ۸۹۰ میلیونه ډالرو په ارزښت سوداګریزه راکړه ورکړه شوې ده.
د طالبانو د سوداګرۍ وزارت ویاند په یوه بیان کې زیاته کړې ده، چې په دې سوداګرۍ کې ۶۲۷ میلیونه ډالرو په ارزښت صادرات او د ۲۶۳ میلیونو ډالرو په ارزښت واردات شامل دي.
طالبان داسې مهال هند سره د تېر کال سوداګریزې راکړې ورکړې راپور خپروي، چې د هند او پاکستان ترمنځ په کشمیر کې د راپورته شوې شخړې له امله په متقابلو اقداماتو کې د افغانستان سوداګري زیانمنه شوې ده.
د معلوماتو له مخې، افغانستان چې هند ته وچه مېوه، زعفران، اینجې او نور توکي لېږدوي، د پاکستان او هند ترمنځ د واګه بندر د تړل کېدو له امله دغه سوداګري زیانمنه شوې او درېدلې ده.
بله خوا د پاکستان د سوداګرۍ فدراسیون وايي، هند به د پاکستان له خاورې د انتقالاتو محدودیتونو له امله افغانستان سره سوداګرۍ کې شاوخوا ۱.۱۴ میلیارده ډالره مالي زیان وکړي.
دا په داسې حال کې ده چې د طالبانو بهرنیو چارو وزیر څو ورځې وړاندې په کابل کې د هند بهرنیو چارو وزارت ځانګړي استازي انند پرکاش سره په سوداګرۍ، ټرانزیټ او نورو دوه اړخیزو مسایلو هم خبرې کړې دي.
# #Afghanistan #India #Pakistan #Transit
