ويب ډيسک
د کرېکلیډ په نوم یوې ډیجیټل او ورزشي رسنۍ ادعا کړې چې د افغانستان دوو ملي لوبغاړو، حضرتالله ځاځي او فرید ملک د شپږیزه لیګ لوبو پرمهال د دوی کارکوونکي ښکنځلي او ګواښونه یې ورته کړي دي.
نوموړې رسنې شنبه د زمري پر ۲۷مه په یوه اعلامیه کې د لوبغاړو دا کار غندلی او په تړاو یې د څېړنو غوښتنه کړې ده.
د اعلامیې له مخې، یادو دواړو لوبغاړو ویلي چې کرېک لیډ په خپلو خپرونو کې پر دوی نیوکې کوي چې له کبله یې ښکنځلو ته اړ شوي دي.
کرېکلیډ یوه ډیجیټل رسنۍ ده چې تر ډېره د افغانستان کرېکټ لوبو ته خبري پوښښ ورکوي او ځينې وختونه پر یو شمېر لوبغاړو نېوکې هم کوي.
په اعلامیه کې راغلي: «کرېک لیډ د افغان کرېکت د ودې او بهبود لپاره کار کوي او سالم انتقاد او اصلاحي نیوکې یې یوازې د کرېکټ د پرمختګ لپاره دي.»
نوموړې رسنۍ د یادو لوبغاړو دا ډول چلند له سپکاوي ډک او له سپورټي اخلاقو لرې بللی او په دې اړه یې له کرېکټ بورډ څخه د جدي پلټنو غوښتنه کړې ده.
د اعلامیې په خبره، کرېکټ بورډ هم ډاډ ورکړی که له څېړنو وروسته لوبغاړي ګرم وپېژندل شي، نو د یاد بورډ د ډېسپلین کمیټې لهخوا به مجازات شي.
۸صبح ورځپاڼې هڅه وکړه چې د افغان کرېکټ بورډ نظر راواخلي؛ خو د دغه بورډ ویاند، سېدنسیم سادات له ځواب ویلو ډډه کړې ده.
فرید ملک او حضرتاالله ځاځي تر اوسه په دې اړه څه نه دي ویلي.
دا لومړی ځل دی چې د هېواد پر ملي لوبغاړو د داسې یوې کړنې ادعا کېږي.
