ویب ډیسک
د پښتونخوا ملي عوامي ګوند مشر محمود خان اڅکزي ،پښتونخوانیشنل عوامي ګوند او ملي جمهوري غورځنګ مشر محسن داوړ یوه ګډه اعلامیه خپره کړې اعلامیه کې راغلي چې د افغانستان په ګڼه مېشته سیمو کې د پاکستان د هوايي ځواک د بمبارۍ له امله د ښځو او ماشومانو په ګډون د ملکي وګړو د مرګ ژوبلې د زیاتېدو په اړه ژوره اندېښنه څرګندوو. موږ له دواړو لورو څخه غوښتنه کوو چې روانه وسله واله شخړه سمدستي پای ته ورسوي. موږ دا کړکېچ یوه نااعلان شوې جګړه بولو چې د ډیورنډ کرښې دواړو غاړو ته مېشت پښتانه په نابرابر ډول اغېزمنوي. دا خورا د اندېښنې وړ ده چې د دې شخړې ۹۹ سلنه قربانیان پښتانه دي.
موږ دا جدي اندېښنه هم څرګندوو چې که د افغانستان په اړه د پاکستان په پالیسي کې روښانه بدلون رانه شي، نو د دې جګړې دوام به د ملکي وګړو ژوند لا ډېر له خطر سره مخ کړي. همدارنګه موږ دا هم د اندېښنې وړ بولو چې په داسې پرېکړو کې پارلمان له پامه غورځول شوی چې د سیمې د خلکو پر ژوند ژورې اغېزې لرلی شي.
مشرانو ؤيلي چې موږ په ډاګه کول غواړو چې د تېرو څو لسیزو راهیسې روان افراطیت او ترهګري، چې ګڼ شمېر بې ګناه انسانان یې قرباني کړي، د ځایي ټولنې پیداوار نه دي. د دې خبرې پیاوړي شواهد شته چې له ۱۹۸۰مې لسیزې راهیسې د میلیاردونو ډالرو پانګونې له لارې د تاوتریخوالي یو جوړښت رامنځته او ساتل شوی، او دغه ویجاړوونکي ځواکونه زموږ سیاسي او ټولنیز جوړښت ته دننه کړل شوي دي.
له څو لسیزو راهیسې پښتانه د پاکستان د تش په نوم “فرنټ لاین سټېټ” د رول د پای ته رسېدو، په سیمه کې د لویو قدرتونو د تاوتریخوالي پر بنسټ د پروژو د ختمېدو، او د پاکستان او افغانستان ترمنځ د سولې او نېکو ګاونډیو اړیکو د پیل غوښتنه کوي.
یادو مشرانو ويلي چې زموږ لپاره په لوېدیځه اسیا کې د جګړې هغه اور، چې د امریکا او اسراییل له خوا پر ایران د امپریالیستي برید له امله بل شوی، سخت د اندېښنې وړ دی. موږ د دښمنۍ او ویجاړوونکو بریدونو د سمدستي پای غوښتنه کوو چې نه یوازې د سیمې د خلکو ژوند او شتمني تباه کوي، بلکې د نړیوال امن لپاره هم خطر ګرځي.
