ویب ډیسک
کابل – بهرنیو چارو وزیر محمد حنیف اتمر، د فلسطین د بهرنیو چارو له وزیر ښاغلي ریاض المالکي سره د يوې تلیفوني اړيکې په ترڅ کې، د روژې په مبارکه میاشت او د اختر په ورځو کې په فلسطیني وګړو باندې د بریدونو او یرغلونو دوام غندنه وکړه او دا خونړۍ بریدونه یې د اسلامي هېوادونو او سوله غوښتونکي ملتونو لپاره د نهمنلو وړ وباله او په سیمه کې د تاوتریخوالي د سمدستي پای غوښتنه وکړه.
ښاغلي اتمر د ښځو او ماشومانو په ګډون د لسګونو فلسطیني ملکي وګړو د شهادت له امله، د فلسطین له حکومت او خلکو سره د ولسمشر محمد اشرف غني او د افغانستان د خلکو ژوره خواشیني څرګنده کړه او ټپیانو ته يې د الله تعالى له دربار څخه د چټکې روغتیا هیله وکړه.
د هېواد بهرنیو چارو وزیر همداراز د فلسطین له ځوريدلي ولس سره د افغانستان د خلکو پیوستون په داګه کړ او ویې ویل چې افغانستان د ملګرو ملتونو د امنیت شورا د ١٩٦٧ پریکړه لیک سره سم، د مشخص شويو سرحدونو په چوکاټ کې د یوه خپلواکه دولت د لرلو لپاره د فلسطین د خلکو مشروع حق څخه ملاتړ کوي.
د خبرو په ترڅ کې، ښاغلي المالکي د هېواد د بهرنیو چارو وزیر څخه د هغه د خواخوږۍ له امله مننه وکړه او د فلسطین د خلکو د مشروع حقونو لپاره یې د اسلامي هیوادونو او د نړۍ د سوله پالو هېوادونو ملاتړ مهم او ارزښتناکه وباله.
په پای کې، ښاغلي اتمر ښاغلي مالکي ته بلنه ورکړه چې په یو مناسب فرصت کې افغانستان ته سفر وکړي.
