ویب ډیسک
د پښتون ژغورنې غورځنګ مشر منظور پښتون په خپل یوه خپور شوي بیان کې ویلي چې دا د څو ساعتونو وړاندې خبره ده چې د خیبر پښتونخوا انتظامیې د پښتون تحفظ موومنټ ایالتي مشر خیرالامین، یواځې د دې له امله ونیوه او د ۳ ایم پي او لاندې بندي کړ، چې ولې یې د مولانا خانزیب په جنازه کې ګډون کړی و. یعنې د دې پر ځای چې د مولانا خانزیب قاتلان ونیول شي، اداره برعکس د جنازې ګډون کوونکي نیسي.
بل پلو ته، د صوبې حکومت هم د حالاتو په اړه هغه دریځ خپل کړی چې تل پوځ خپلوي. کله چې له پوځ وپوښتل شي چې ولې پر پښتنو چاودنې کېږي، نو سمدستي د هند نوم اخلي او له ځانه نه ځان خلاصوي. بلکل همدا حال د خیبر پښتونخوا د حکومت دی، چې په هره ستونزه کې د مرکز نوم اخلي او له خپلې ذمه وارۍ ځان خلاصوي.
د صوبې حکومتونه تل د پنجاب د واکمنو حلقو غلامي کړې ده. ملک نصیر آفریدي ته لاسونه وتړل شول او د نیغ په نیغه ن ليګ پنجاب حکومت ته وسپارل شو. د خیبر پښتونخوا د پی ټي آی حکومت او انتظامیې ته نه د هغه د سپینې ږیرې عزت مهم و، نه د هغه بې ګناهۍ خیال. نن هغه پنجاب کې لادرکه دی.
د خپل ټول عمر د پښتنو خدمت کوونکی سپین ږیری حاجي عبدالصمد هم د خیبر پښتونخوا انتظامیې د پیپلز پارټۍ د سندھ حکومت ته وسپاره، او هغه نن هم د سندھ د ګرمو سیمو په زندانونو کې له سختو کړاوونو سره مخ دی.
له وقار نه تر فضل امین آفریدی پورې، د کالج زده کوونکي د خیبر پښتونخوا انتظامیې وتښتول، بدترین تشدد یې پرې وکړ، او هڅه یې وکړه چې له هغوی نه په زور لاسلیکونه واخلي چې پر ظلمونو خبرې بندې کړي.
مفتی منیر شاکر د شهادت نه څو ورځې وړاندې، د خیبر پښتونخوا انتظامیې د هغه د شخصي امنیت لپاره جاري شوو اسلحو جوازونه منسوخ کړل، ترڅو هغه له خپل امنیته بې برخې شي.
د کرم د مسئلې د حل لپاره چې پښتنو قومي جرګې د ټولې پښتون سیمو نه مشران راجمع کړل او یو لایحه جوړه کړه، نو خیبر پښتونخوا انتظامیې هغوی په کوهاټ کې ودرول چې دا کار و نه کړي.
کله چې پښتون ژغورنې غورځنګ د خیبر جرګې د شهیدانو لپاره د ایف آی آر درج کولو هڅه وکړه ـ چې پکې محسن نقوي، د پولیسو IG او نور چارواکي شامل وو ـ نو دغه ایف آی آر ونه ثبت شوه، بلکې برعکس د جرګې پر منتظمینو د قتل ایف آی آر درج شو. پکې خان ولي آفریدي، حاجي عبدالصمد، او ملک نصیر شامل وو، چې سختې زندانونه یې تېر کړل.
