ویب ډیسک
د فرانس ولسمشر ايمانوئل مېکرون د جمعې په ورځ په يوه خبري غونډه کې وويل چې دی د هر حال په صورت کې د فلسطين د دولت په رسميت پېژندلو ته ژمن دی.
اسرائيل پر ايران هغه وخت بريد وکړ کله چې د فلسطين کنفرانس د جوړېدو په حال کې و… د ملګرو ملتونو له خوا د اسرائيلو-فلسطين د مسئلې کنفرانس د ايران پر ضد د بريد وروسته وځنډول شو.
ولسمشر مېکرون وويل: “دا ځنډ زموږ د دوه دولتونو د حل د پلي کولو پر ژمنتيا هېڅ اغېز نه لري. ما مخکې هم ويلي چې د هر حالت په صورت کې به د فلسطين د دولت په رسميت پېژندلو ته دوام ورکوم.”
د ملګرو ملتونو يوه لوړ پوړې کنفرانس، چې فرانسې او سعودي عربستان يې کوربه توب کاوه او هدف يې د اسرائيلو او فلسطين ترمنځ د دوه دولتونو حل لارې هوارول وو، د اسرائيل له خوا پر ايران د پوځي بريد وروسته ځنډول شوی دی، دا خبره دوو سرچينو د جمعې په ورځ وکړه.
په رياض کې يوې لوېديځې ديپلوماتيکې سرچينې وويل چې سعودي-فرانسوي کنفرانس ځنډول شوی، چې يوه برخه يې د ايران پر ضد د بريدونو له امله ده. يوه بله سرچينه وايي چې د منځني ختيځ ځينې پلاوي د روانو حالاتو له امله ګډون نه شي کولی.
دا کنفرانس ټاکل شوې وه چې د جون له ۱۷مې تر ۲۰مې نېټې پورې په نيويارک کې ترسره شي، چې موخه يې د فلسطين د دولت لپاره د يو پلان جوړول وو، او همداراز د اسرائيلو امنيت هم پکې شامل و. د فرانس ولسمشر ايمانوئل مېکرون به د جون په ۱۸مه ګډون کاوه.
مېکرون له دې وړاندې هم اشاره کړې وه چې فرانسه ښايي په دې کنفرانس کې د اسرائيلو تر اشغال لاندې سيمو کې د فلسطين دولت په رسميت وپېژني، چې اسرائيل يې مخالفت کړی دی.
