ويب ډیسک
په افغانستان کې د طالبانو حکومت وايي، د هرات-خواف د اورګاډي پتلۍ دریمې برخې د پاتې چارو او لېږد-رالېږد بیا پیلېدو او د اوسپنې پټلۍ پرسونل ته د مسلکي زدکړو چمتو کولو په موخه یې یو پلاوی ایران ته تللی.
دا پلاوی به ایران کې درې ورځې تېروي، چې ټاکل شوې د ایران د لارو او ښار جوړونې وزارت او اوسپنې پټلۍ ادارې له چارواکو سره هر اړخیزې خبرې وکړي.
پلاوی د طالبانو د حکومت د اوسپنې پټلۍ ادارې د مشر ملا بخت الرحمن شرافت په مشرۍ چارې مخته وړي.
د هرات-خواف د پټلۍ پروژه څلور برخې لري؛ اوله برخه یې له خواف د ایران تر سنګان، دویمه برخه یې له سنګان تر چا سرخ پولې پورې ده چې دواړه برخې ۷۶ کیلومتره کېږي.
د هرات-خواف پټلۍ ۲۵۵ کيلومتره اوږدوالی لري چې بالاخره د ۲۰۲۰ کال په ډیسمبر میاشت کې د ایران او افغانستان ترمنځ ۱۰ کاله وروسته رسماً پرانیستل شوه.
افغانستان دا مهال له ترکمنستان، ازبکستان، قزاقستان، روسیې، اوکرایین او چین پټلیو سره نښلول شوی او د هرات-خواف پټلۍ فعالېدل یې له ایران، ترکیې او اروپا پټلۍ سره هم نښلوي.
