ويب ډيسک
په افغانستان کې د د ښځو د حقونو د نقض په اړه د نړۍوالو ټولنې اندېښنو او غوښتنو سره سره طالبان وایي، د ښځو پر وړاندې د هر ډول خشونت او تاوتریخوالي مخه نیول شوې.
له شاوخوا یوې پېړۍ راهیسې په ټوله نړۍ کې خلک د مارچ اتمه د ښځو نړیوالې ورځې په توګه لمانځي.
دا یوه نړیواله ورځ ده چې د ښځو لاسته راوړنې په رسمیت پېژني او د لمانځنې تر څنګ یې د جنسیتي نا برابرۍ او توپیري چلند په اړه پوهاوی لوړوي.
د طالبانو ویاند ذبیحالله مجاهد پر خپله اېکسپاڼه لیکلي: «مېرمنې زموږ میندې، خوندې، لورګانې او د ژوند شریکانې دي، کوم حقوق چې اسلامي شریعت ورته معرفي کړي، اسلامي امارت د هغو حقوقو په ورکړه او ساتنه ځان مکلف بولي، د ښځو عفت، عزت او شرعي حقوق ساتل د امارت اولویت دی، نن سبا افغان میرمنې له فزیکی او رواني پلوه په مصئونیت کې ژوند کوي.»
هغه لیکلي، د ښځو پر وړاندې د هر ډول خشونت او تاوتریخوالي مخه نیول شوې او هيڅوک نه کولای د ښځو حقوق تلف کړي او یا هغې ته په بده وګوري.
د مجاهد په خبره، دوی ورو اړوندو ارګانونو مکلفیت دی چې د ښځو د حقوقو په تأمین کې خپله ټوله سعیه وکړي؛ د هغوی د زوجیت اختیار یقیني کړي، د مهر او میراث حق ورته حاصل او د هغوی له ټولو حقوقو څخه ساتنه او څارنه وکړي.
دا په داسې حال کې ده چې نن یو شمېر افغان مېرمنو او بېلابېلو نړۍوالو سازمانو په افغانستان کې د ښځو د بشري حقونو په اړه اندېښنې ښودلې وه له طالبانو څخه یې غوښتي و چې د ښځو په اړه خپل صادر شوي فرمانونه لغوه کړي.
د یادونې ده چې طالبانو په افغانستان کې د ګڼو نورو محدودیتونو ترڅنګ ښځې له کار او زده کړو منعه کړې ده
