ویب ډیسک
د ملګرو ملتوتو د بشري حقونو عالي کمېشنر ولکر ټرک افغانستان کې پر نجونو او ښځو د لګول شويو بنديزونو ته په اشارې سره ويلي، چې دغه هېواد کې د طالبانو له لوري د ښځو حقونه په سيستماتيک ډول تر پښو لاندې کېږي.
ولکر ټرک د فرانسې خبري اژانس سره په خبرو کې وويل، دا ډېره د اندېښنې وړه ده چې د بشري حقونو له اعلامیې ۷۵ کاله وروسته، د نجونو او ښځو د حقونو د سلب لپاره هڅې ډېرې شوي او دغه هڅې پاروونکې او بې مخينې دي او بلاخره به ناکامه شي.
ښاغلي ټرک د طالبانو وروستيو اقداماتو ته په اشارې سره، د افغان نجونو او ښځو د ژوند وضعيت ترينګلی وبله او ويې ويل، راغلی وضعيت بې مخينې دی.
د م.م د بشري حقونو عالي کمېشنر همداراز ويلي، په مناسب وخت کې غواړي افغانستان ته سفر وکړي او طالبان په دې متقاعد کړي چې د هېواد پرمختګ کې د ښځو ونډه په پام کې ونيسي.
هغه ټينګار وکړ، هېڅ هېواد نه شي کولای له ټولنيز او اقتصادي اړخه د نيمې برخې نفوس په حذفولو سره ثبات او پرمختګ ته ورسېږي.
دا په داسې حال کې ده، چې د طالبانو له لوري پر افغان ښځو وروستيو بنديزونو د هېواد دننه او بهر پراخ او سخت غبرګونونه راپارولي دي.
