د بلوچستان د قلعه عبدالله ولسوالۍ اړوند د توبې اڅکزي په سيمه کې د ځمکې پر سر د تره زامنو ترمنځ خونړۍ شخړه شوې، چې له امله يې څلور کسان وژل شوي او يو بل ټپي شوی دی.
سرچينې وايي، د ملکيت پر سر راپورته شوې لانجه په وسلواله نښته بدله شوه، چې ورسره سيمه د سخت تاوتريخوالي شاهده وه. د پېښې له رامنځته کېدو وروسته ژغورنې ډلې او امنيتي ځواکونه سمدستي سيمې ته ورسېدل.
د وژل شويو مړي او ټپي کس د درملنې او نورو قانوني چارو لپاره د ميزۍ اډې ټراما سنټر ته لېږدول شوي دي.
ځايي ادارې او لېويز ځواکونو په سيمه کې امنيتي تدابير سخت کړي، څو د دواړو کورنيو ترمنځ د نور تاوتريخوالي مخه ونيول شي.
د يادونې وړ ده، چې په دې وروستيو کې په بلوچستان کې د ځمکو او قبایلي شخړو پېښې زياتې شوې دي، چې له امله يې ګڼو کورنيو ته مرګ ژوبله اوښتې ده.
