ويب ډیسک
د افغانستان کونړ ولايت په دانګام ولسوالۍ کې د واورې ښویېدو له کبله نهه کسان وژل شوي دي.
هلته د طالبانو د حکومت د اطلاعاتو او کلتور سرپرست ريیس نجیب الله حنیف مشال راډیو ته ويلي چې پېښه د فبرورۍ پر اوومه نېټه سهار وختي ډېورنډ کرښې ته څېرمه په ګوریګاه سیمه کې شوې ده.
دی زیاتوي چې تر اوسه له واورو د نهو کسانو مړي راایستل شوي دي او پینځه کسان ټپیان هم دي.
د دانګام ولسوالۍ د ځوانانو شورا مشر ذبیح الله هم مشال راډيو ته ويلي چې هغه کسان تر واورو لاندې شوي دي چې غوښتل یې په قاچاقي توګه پاکستان ته واوړي.
