ويب ډیسک
په افغانستان کې د ملګرو ملتونو سازمان ماموریت (یوناما) د طلوع تلویزيون ژورنالیستانو د نیولو په اړه خپله «ژوره اندیښنه» ښودلې ده.
د پنجشنبې ورځې رپوټونو کې ويل شوي چې د دغه خصوصي تلویزیون ژورنالیستان د طالبانو استخباراتو له لوري نیول شوي دي.
یوناما د طلوع نیوز خبریالانو د نیولو په اړه خپله ژوره انديښنه ښودلې تر څنګ د هغوی د ژر تر ژره آزادولو غوښتنه کړې ده.
دغه سازمان زیاته کړې چې په دې اړه د تیرې شپې موثقو رپوټونو سره د خبریالانو د نیولو په اړه اندیښنې نورې هم ډيرې کړې.
يوناما په دې اړه پر ټويټر ليکلي دي: «د ملګرو ملتونو سازمان د ټولو هغو کسانو آزادول غواړي چې د وسلوالو کسانو له خوا نیول شوي او د خبريالانو او رسنیو د آزادۍ پر وړاندې ویرې او ګواښونو ته دې د پای تکی کيښودل شي.»
د پنجشنبې په مازديګر د طلوع نیوز تلویزيون د څو تنو مهمو کارمندانو د نیولو رپوټونه ورکړل شول.
د فرانسې خبري آژانس له کابله ليکي چې دغه کسان د طالبانو د استخباراتو ادارې لخوا نیول شوي، اما د دغه چینل له خوا يې کوم فوري تائيد موجود نه وو.
بشري سازمانونه وايي په افغانستان کې واک ته د طالبانو تر رسیدلو وروسته پر رسنیو او خبریالانو باندې حملې ډيرې شوي دي او دغه کړنې يې محکومې کړي دي.
طالبان د تیرکال په اګست میاشت کې تر شل کلنې جګړې او له افغانستانه د بهرنیو ځواکونو له وتلو سره سم، په چټکۍ بیرته واک ته ورسیدل او د لويديځ له ملاتړه برخمن د کابل حکومت يې نسکور کړ.
