د بلوچستان نېشنل ګوند (بي اېن پي) مشر سردار اختر جان مېنګل په کوټه کې د زیارت پېښې پر ضد د روان پرلت ګډونوالو ته په وینا کې د زیارت پېښې او د بلوچستان د نورو امنیتي او سیاسي ستونزو په تړاو خپلې اندېښنې څرګندې کړې.
هغه وویل، که په بلوچستان کې رښتیا هم حالات ښه وي، نو بیا خلک ولې د خپلو حقونو د غوښتنې لپاره پرلتونو ته اړ کېږي. د ده په وینا، په هغه ټولنه کې چې د حقیقت ویل جرم وګڼل شي او د حق غوښتنه سزا ولري، د دوام وړ نه وي.
اختر مېنګل د زیارت پېښې او نورو ورته پېښو د خپلواکو، بې پرې او روڼو پلټنو غوښتنه وکړه او ویې ویل، که د عدالت نظام شتون ولري، نو د دغو پېښو حقیقت باید خلکو ته څرګند شي.
هغه دا هم وویل چې په بلوچستان کې د لېویز ځواک د ختمولو او له پولیسو سره د یوځای کولو په ګډون بېلابېل اداري بدلونونه ترسره شول، خو د ده په خبره، دغو تجربو مطلوبه پایله ورنه کړه.
د بي اېن پي مشر زیاته کړه، د ستونزو د حل پر ځای وخت ناوخت بېلابېلې کمېټې او استازي لېږل کېږي، خو اساسي او دوامدار حل نه وړاندې کېږي. هغه له اعتراض کوونکو وغوښتل چې د خپلو قانوني غوښتنو لپاره پر خپل دریځ ټینګ پاتې شي.
اختر مېنګل وویل، په ډېرو هېوادونو کې حکومتونه د یوې مرګونې پېښې له امله هم حساب ورکوي، خو په بلوچستان کې له ګڼو خونړیو پېښو سره سره هېچا مسؤلیت نه دی منلی. د ده په وینا، که چارواکي له خلکو سره رښتینې خواخوږي ولري، نو باید د اغېزمنو کورنیو ترڅنګ ودرېږي.
هغه وویل چې په اسلاماباد او نورو فورمونو کې یې د زیارت، هنه او د بلوچستان د نورو پېښو په اړه خپل غږ پورته کړی او ټینګار یې وکړ چې ګوند به یې د اغېزمنو کورنیو له هر هغه سولهییز احتجاجي دریځ څخه ملاتړ وکړي چې هغوی یې غوره کوي.
اختر مېنګل ادعا وکړه چې د بلوچستان خلک له اوږدې مودې راهیسې له بېعدالتۍ او محرومیتونو سره مخ دي، او زیاته یې کړه چې د سیمې طبیعي زېرمو ته پام شوی، خو د خلکو ستونزو ته لازم پام نه دی شوی.
هغه د کوټې د سول روغتون د خونړۍ پېښې په ګډون د نورو پېښو یادونه هم وکړه او ویې ویل چې ګڼو قربانیانو او د هغوی کورنیو تر اوسه عدالت نه دی ترلاسه کړی. د ده په وینا، په بلوچستان کې لا هم ډېرې کورنۍ د خپلو ورک شویو عزیزانو د برخلیک په تمه دي، خو د زیارت د پېښې قربانیانو لږ تر لږه د خپلو عزیزانو جسدونه د ښخولو لپاره ترلاسه کړل.
