د پښتونخوا ملي عوامي ګوند مرکزي منشي نواب محمد ایاز خان جوګېزي د زیارت ولسوالۍ د وروستۍ پېښې پر ضد د کوټې په کویله پهاټک کې روان احتجاجي پرلت ته د وینا پر مهال وویل، پښتانه باید بېسرپرسته ونه ګڼل شي، ځکه که عدالت تأمین نه شي او د خلکو حقونه تر پښو لاندې شي، روان وضعیت به لا پسې کړکېچن شي.
هغه خپله وینا د خوشحال خان خټک په یوه شعر پیل کړه او ویې ویل، هغه میندې د ستاینې وړ دي چې داسې زامن یې روزلي دي چې د ده په وینا، د خپل وطن د دفاع لپاره یې خپل ژوند قربان کړی دی. نوموړي وویل، دا خاوره چا په خیرات نه ده ورکړې، بلکې پلرونو او نیکونو یې د لویو قربانیو او مبارزو په پایله کې ساتلې ده.
جوګېزي وویل، پښتانه نن د خپلمنځي اختلافونو له امله له سختو ستونزو سره مخ دي. د هغه په وینا، که د یووالي پر ځای بېلتون دوام وکړي، راتلونکی به تر نن هم ستونزمن وي. هغه خبرداری ورکړ چې که روان تاوتریخوالی پراخ شي، هېڅوک به ترې خوندي پاتې نه شي، که هر څومره قوي امنیتي تدابیر هم ولري.
هغه یادونه وکړه چې څو کاله وړاندې په وزیرستان کې هم ورته وضعیت رامنځته شوی و، خو له هغې تجربې څخه لازم درس وانخیستل شو. د نوموړي په خبره، اوسني حالات د اندېښنې وړ دي او که پر وخت یې مخه ونه نیول شي، اغېزې به یې نورو سیمو ته هم وغځېږي.
د پښتونخوا ملي عوامي ګوند دغه مشر پر ټولنیزو رسنیو د کرکې او پاروونکو مطالبو پر خپرېدو هم نیوکه وکړه او ویې ویل، دا ډول کړنې د خلکو ترمنځ واټن او بېباوري زیاتوي. هغه له سیاسي ګوندونو وغوښتل چې د سولې او امنیت د ټینګښت لپاره خپل اختلافونه د لنډ وخت لپاره یوې خوا ته کړي او په ګډه د روان وضعیت د ښه کېدو لپاره کار وکړي.
جوګېزي وویل، اوسنی کړکېچ یوازې د زیارت یا هنه اوړک ستونزه نه ده، بلکې د ده په وینا، له شیراني څخه تر چمن پورې د ټولې سیمې لپاره د اندېښنې وړ دی. هغه له خلکو وغوښتل چې د قومي او سیاسي اختلافونو پر ځای د یووالي او ګډ اقدام لاره خپله کړي.
هغه د طبیعي زېرمو او کانونو په اړه هم خبرې وکړې او ویې ویل، د دغو سرچینو په اړه پرېکړې باید د سیمې د خلکو د حقونو او عادلانه اصولو له مخې وشي. د نوموړي په وینا، که نړیوال شرکتونه پانګونه کوي، نو تړونونه باید له اصلي مالکانو سره وشي او د سیمې د خلکو حقونه پکې خوندي وي.
جوګېزي پر اقتصادي وضعیت هم نیوکه وکړه او ویې ویل، پورونه او اقتصادي ستونزې د خلکو ژوند لا سخت کړی دی. هغه وویل، که بېعدالتي دوام وکړي او د خلکو ترمنځ د محرومیت احساس زیات شي، نو امنیتي ستونزې به هم پراخې شي.
نوموړي د زیارت د پېښې قربانیانو ته درناوی وړاندې کړ، د هغوی له کورنیو سره یې خواخوږي څرګنده کړه او له ټولو سیاسي ګوندونو، قومي مشرانو او خلکو یې وغوښتل چې د سولې، یووالي او د خپل وطن او سرچینو د ساتنې لپاره ګډې هڅې وکړي.
