لیکنه: زارا داوړ
ښځه د انساني ټولنې هغه بنيادي ستنه ده چې پر هغې د ژوند ډېر اړخونه ولاړ دي. که مونږ د يوې سالمې، پرمختللې او بااخلاقه ټولنې تصور وکړو، نو بې له شکه به د هغې تر شا د يوې پوهې، بااحساسه او باارادې ښځې موجوديت وي. ښځه يوازې د کور د چارو سمبالوونکې نه ده، بلکې د نسلونو روزونکې، د ارزښتونو ساتونکې او د ټولنيز پرمختګ يوه مهمه لارښوونکې ده.
په حقيقت کې کور د ماشوم لومړنی ښوونځی دی او مور د هغه لومړنۍ ښوونکې وي. ماشوم هغه څه زده کوي چې ويني، اوري او احساسوي. د مور اخلاق، خبرې، چلند او فکرونه د ماشوم پر ذهن ژور اثر کوي. که ښځه د علم او پوهې له رڼا څخه برخمنه وي، نو کولی شي چې خپل اولاد ته د ژوند سم لوری وښيي، هغوی ته د حق او باطل ترمنځ توپير ور زده کړي او د هغوی په شخصيت کې د انسانيت، زغم، صداقت او مسؤليت احساس وروزي.
برعکس که ښځه چې له تعليم او پوهاوي څخه بې برخې پاتې شي، نو دا تشه يوازې د هغې په ژوند پورې نه محدوده کېږي، بلکې د راتلونکو نسلونو پر برخليک هم اغېز کوي. ناپوهي د غلطو دودونو، ناسمو پرېکړو او ټولنيزو ستونزو سبب ګرځي. همدا لامل دی چې پرمختللې ټولنې تل د ښځو تعليم ته لومړيتوب ورکوي، ځکه هغوی پوهېږي چې د يوې باعلمې ښځې روزنه د يوې سالمې ټولنې جوړول دي.
ښځه يوازې د کور دننه رول نه لري، بلکې د ټولنې په هر ډګر کې خپله اغېزناکه ونډه ادا کولی شي. که هغې ته مناسب فرصتونه برابر شي، نو کولای شي په تعليم، طب، سياست، اقتصاد او نورو برخو کې د پام وړ بدلونونه راولي. خو دا هر څه هغه وخت شوني دي چې ښځې ته د عزت، باور او زده کړې حق ورکړل شي.
مونږ بايد دا ومنو چې د ټولنې پرمختګ د ښځو له پرمختګ سره تړلی دی. که مونږ غواړو چې يو باعزته، پرمختللی او سوکاله ټولنه ولرو، نو اړينه ده چې ښځو ته د تعليم، ازاد فکر او پرمختګ لارې هوارې کړو. ځکه ښځه يوازې يو فرد نه دی، بلکې د يوې ټولنې جوړوونکې ده. لکه چې ويل کېږي، يوه باعلمه ښځه، يو روښانه راتلونکی زېږوي.
