د خیبر پښتونخوا په باجوړ ولسوالۍ کې د پاکستان او افغانستان په پوله د پولیسو په وینا، د افغانستان له لوري د هاوان مرمۍ د ملکي وګړو په یوه کور ولګېدې چې له امله یې دوه ښځې او یو ماشوم ووژل شول او یوه نجلۍ ټپي شوه.
د باجوړ د پولیسو یوه چارواکي د نوم نه ښودلو په شرط رسنيو ته وویل چې د هاوان مرمۍ د زاهد په نوم د یو سړي په کور ولګېدې، چې پولې ته نږدې په لغرای سیمه کې موقعیت لري.
چارواکي وویل: «په پوله د نښتو له امله، له افغانستان څخه د هاوان مرمۍ توغول شوې، چې په ملکي وګړو ولګېده، چې د یوې کورنۍ درې غړي یې ووژل.»
چارواکي وویل چې په تیر روژه کې هم په همدې کور د هاوان یوه مرمۍ لګېدلې وه او په دې پیښه کې دوه کسان هم وژل شوي وو.
