داودجبارخیل
اسلاماباد — د پاکستان پښتنه ټيک ټاکره ثنا جاوېد په اسلام آباد کې د ډزو په پېښه کې وژل شوې ده. د پولیسو په وینا، د پېښې اصلي شکمن محمد صادق، چې د نوموړې مېړه و، له ډزو وروسته ځان وژنه کړې ده.
د پولیسو چارواکو رسنیو ته ویلي چې پېښه د استوګنې په یوه سیمه کې رامنځته شوې او د پېښې له ځایه درې کارتوس او یوه تومانچه ترلاسه شوې ده. چارواکو زیاته کړې چې د پېښې د علت د معلومولو لپاره پلټنې روانې دي.
ثنا جاوېد، چې د Attock اصلي اوسېدونکې بلل کېږي، په پښتو ژبه په ټولنیزو رسنیو کې فعاله وه او په ټيک ټاک کې یې شاوخوا یو میلیون او دوه لکه تعقیبونکي لرل. نوموړې د خپلو ویډیوګانو له لارې د پښتو مینوالو لپاره بېلابېل ټولنیز او کلتوري محتوا وړاندې کوله.
راپورونه وايي چې ثنا جاوېد ځینې وختونه په خپلو ویډیوګانو کې د افغانستان د ملي بیرغ په رنګونو جامې هم اغوستلې، چې له امله یې د هغې ویډیوګانې په ټولنیزو رسنیو کې پراخ غبرګونونه درلودل.
د پېښې په اړه خپره شوې ویډیو کې لیدل کېږي چې شکمن کس له کوره راوځي، پر ثنا جاوېد ډزې کوي او وروسته خپله هم ځان وژنه کوي. پولیسو ویلي چې شکمن د اټک یو پخوانی پولیس افسر و او تر دې وړاندې له دندې ګوښه شوی و.
