ویب ډیسک
ويب ډيسک
د پاکستان د جمعیت علمای اسلام ګوند مشر په تازه څرګندونو کې ویلي، چې د افغانستان له پخواني پاچا ظاهر شاه نیولې تر ولسمشر محمد اشرف غني پورې د افغانستان حکومتونه د پاکستان ضد وو.
مولانا فضل الرحمن په یوه خبري غونډه کې زیاته کړې، چې یوازې طالبان د پاکستان پاخه ملګري او پلویان دي، خو د خپلو ناسمو تګلارو له امله نه دی توانېدلی چې دغې ډلې سره د پخوا په څېر اړیکې ټینګې کړي.
فضل الرحمن د یوه بریالي پاکستان په جوړولو کې له طالبان سره پراخې اړیکې د پاکستان په ګټه یادې کړې دي او غوښتنه یې کړې، چې لکه څنګه چې پاکستان د هند پر ضد متحد دی، همداسې باید طالبانو سره نږدې اړیکې ولري.
مولانا فضل الرحمن، پر افغانستان د طالبانو له واکمنۍ وروسته کابل ته هم تللی او د طالبانو او پاکستان ترمنځ د اړیکو جوړلو هڅې سربېره یې په افغانستان کې د جمهوري اسلامي نظام پر وړاندې د یادې ډلې جګړه «جهاد» باله.
د فضل الرحمن د ګوند په ګډون د پاکستان مذهبي ګوندونو مشران داسې مهال د هند پر وړاندې د متحد کېدو یوه خبري غونډه کې خبرې کوي، چې د طالبانو بهرنیو چارو وزارت د پهلګام پېښه د غندنې وړ او ورته پېښې یې د سیمې امنیت او ثبات لپاره ګواښ بللې وې.
کارپوهان وايي پاکستان هڅه کوي، له بېلابېلو لارو طالبانو سره د پخوا په څېر اړیکې عادي او د دغې ډلې د اړیکو هغه بلانس زیانمن کړي، چې غواړي په سیمه کې د هند په څېر له نورو هېوادونو سره د نږدې کېدو هڅې کوي.
# #Afghanistan #Pakistan #India
