ويب ډیسک
د پاکستان د بلوچستان ايالت د اطلاعاتو وزیر جان اڅکزی وايي، له افغانستان سره په ټولو لارو پر ويزې تګ راتګ د پاکستان د ملي امنيت مسئله ده او دا پرېکړه په هره بيه او قربانۍ پلي کوي.
نوموړي په خپلو تازه څرګندونو کې ويلي، چې له دې وروسته د پاکستان حکومت افغانستان سره پر ټولو لارو د “یو سند رژيم” پلي کوي.
د اڅکزي په وينا، پر تورخم لاره د افغان لويو باروړونکو موټر چلوونکو لپاره هم د ويزو لرل اړين ګڼل شوي دي.
نوموړی داسې مهال دا څرګندونې کوي، چې په چمن کې له څو مياشتو راهيسې د سيمې اوسېدونکي د يو پرلت په ترڅ کې له پاکستانه غوښتنه کوي چې د تګ راتګ لپاره د پاسپورت او ويزو لرلو شرط لرې کړي.
په ورته وخت کې د تورخم په شمول پاکستان سره د تګ راتګ ټولې لارې د افغان باروړونکو موټر چلوونکو پر مخ بندې شوي او د تګ راتګ لپاره يې د ويزو غوښتنه کېږي.
