ويب ډیسک
د ملګرو ملتونو سرمنشي انتونیو ګوتریش وایي، د دوحې ناسته د ت.البانو رسمیت پېژندلو لپاره نه وه.
انتونیو ګوتریش د افغانستان په اړه د هېوادونو ځانګړو استازو ناستې پای کې ویلي، د غونډې ګډونوال د افغانستان ثبات په هکله اندېښمن ؤ، که څه هم موږ له محدودیتونو سره مخ یو خو دې نتیجې ته رسېدلي یو چې ټولې خواوې باید د افغانستان په اړه همغږي چلند ولري.
انتونیو ګوتریش په نادولتي ادارو کې د افغان ښځو پر کار بندیز ته په اشارې زیاتوي چې د ښځو پر حقونو د پرله پسې بریدونو شاهدان یو، موږ باید خپل غږ پورته کړو.
د هغه په وینا د غونډې ګډونوالو د ښځو پر زدهکړو او کار د ت.البانو بندیزونه په یوه غږ وغندل.
د ملګرو ملتونو سرمنشي د افغانستان د کړکېچ د پېچلتیا ارزونه ستونزمنه بللې او ویلي یې دي چې ۹۰ سلنه افغانان بې وزلۍ کې ژوند کوي، ۶ میلیونه ماشومان، نارینه او ښځې د قحطۍ سره مخ دي.
ګوتریش افغانستان کې د ملګرو ملتونو یوازینۍ ستونزه مالي مرستې یادوي او وایي چې د ژمنه شویو مالي مرستو څخه لږه اندازه یې ترلاسه شوي دي.
هغه زیاتوي افغانستان کې د ترهګریزو ډلو د پام وړ شتون، د یوه جامع حکومت نشتوالی، د ښځو وضعیت خرابوالی او د نشهیي توکو د قاچاق مسله ټول یو له بل سره تړلي دي.
د ملګرو ملتونو سرمنشي په وینا دغه سازمان دوه لسیزې د افغانانو سره پاتی شوی او له دې وروسته هم د دغه هېواد وګړو ملاتړ ته ژمن دی.
د ملګرو ملتونو په کوربهتوب د قطر پلازمینه دوحه کې د افغانستان په اړه د ځانګړو استازو دوه ورځنې ناسته ترسره شوه چې لومړیو کې ویل کېده د ت.البانو په رسمیت پېژندې به په کې بحث وشي.
#Afghanistan #DohaMeeting #Doha #دوحه
