ويب ډیسک
د بهرنیو چارو وزارت ویاند عبدالقهار بلخي څرګنده کړې؛ تېر ماښام د ا.ا.ا بهرنيو چارو او اطلاعاتو او فرهنګ وزارتونو چارسمبالو مولوي امير خان متقي او ملا خیرالله خیرخواه د قطر هېواد د کورنۍ او ټولنيزو چارو پرمختګ له وزيرې مريم المسند او مل پلاوي سره وکتل.
د نوموړي د څرګندونو له مخې؛ په کتنه کې مریم المسند ويلي، چې د دې د وزارت کاري برخه د يتيمانو، ښځو او معلولينو لپاره د کورني ژوند، کار، اقتصاد او تعليمي خدماتو وړاندې کول او د خيريه بنسټونو د چارو تنظيمول دي او دوی چمتو دي، چې د افغانستان له بيوزلو سره بشردوستانه مرستې وکړي.
د افغانستان پلاويد دوی د کار ساحه او مسووليت ډېر دروند وباله او نوموړې ته یې افغانستان ته د راتګ بلنه ورکړه، چې د افغان ميرمنو، يتيمانو او معلولينو حالات له نږدې وویني او د قطر خيريه بنسټونو له لارې ماشومانو، ميرمنو او په نورو اړینو برخو کې خپل خدمات وړاندې کړي.
