پاکستان او ایران د دوه اړخیزې سوداګرۍ د پراختیا لپاره یو مهم ګام پورته کړی دی. د پاکستان د عوایدو فدرالي ادارې (اېف بي آر) د تفتان پولې د اورګاډي تمځای د وارداتو او صادراتو لپاره د ځمکنۍ ګمرکي مرکز په توګه اعلان کړی دی.
د دې پرېکړې له مخې به د دواړو هېوادونو ترمنځ سوداګریز توکي د اورګاډي له لارې په اسانه لېږدول کېږي، چې ورسره به د لېږد لګښتونه راکم او قانوني سوداګري پیاوړې شي.
د ایران د دولتي خبري اژانس ارنا د راپور له مخې، د تفتان په تمځای کې به د توکو بارول، کښته کول، ګمرکي چارې او د وارداتو او صادراتو ټولې اړینې اسانتیاوې برابرې وي.
پاکستان او ایران هوډ لري چې خپله دوه اړخیزه سوداګري پنځه میلیارده امریکایي ډالرو ته ورسوي.
کارپوهان وایي، دا پرېکړه به د ناقانونه قاچاق مخه تر یوه بریده ونیسي او د قانوني سوداګرۍ د پراختیا لپاره به زمینه نوره هم برابره کړي.
