د انګلستان په مانچسټر ښار کې یو ۲۴ کلن افغان وګړی د یوې ۱۷ کلنې نجلۍ د جنسي تېري او جنسي ځورونې په تړاو په څو تورونو تورن شوی دی.
د شمال لوېدیځې انګلستان د مانچسټر سترې پولیسو ویلي، عبدالله شینواري د جنسي تېري په دوو، د جنسي ځورونې په دوو، د مرګ لامل نه کېدونکې زندۍ کولو او د وېشلو په موخه د نشهيي توکو د ساتلو په تورونو تورن شوی دی.
پولیس وايي، دغه تورونه د یوې کم عمره نجلۍ د ادعا شوي برید په اړه د ترسره شوې څېړنې په پایله کې لګېدلي او قضیه لا هم تر څېړنې لاندې ده.
شینواري د دغې قضیې په تړاو محکمې ته هم وړاندې شوی دی.
پولیسو د پېښې نور جزیات نه دي خپاره کړي، څو د شکایت کوونکې نجلۍ هویت خوندي پاتې شي. د انګلستان قوانین د جنسي جرمونو د قربانیانو د هویت د څرګندولو په اړه محدودیتونه لري.
د یادونې وړ ده چې پر نوموړي لګېدلي تورونه لا په محکمه کې نه دي ثابت شوي او د انګلستان د قوانینو له مخې، هر تورن کس تر هغه بېګناه ګڼل کېږي، څو یې جرم په محکمه کې ثابت شوی نه وي.
پولیسو له هغو کسانو چې د دغې قضیې په اړه معلومات لري، غوښتي چې له چارواکو سره یې شریک کړي.