د بلوچستان په دوکي ولسوالۍ کې په یوه له اوږدې مودې راهیسې تړل شوي سکارهکان کې د زهري ګاز له امله دوه کانکېندونکي مړه او څلور نور بېهوښه شوي دي.
د کانونو او منرالونو ادارې د چارواکو په وینا، شپږ کارګر یوه پخواني تړل شوي کان ته ښکته شوي وو، څو د کان د بېرته فعالولو لپاره یې حالت وڅېړي. د کان د اوږدې مودې تړل کېدو له امله دننه د میتان ګاز راټول شوی و.
چارواکي وايي، کارګرانو له ښکته کېدو لږ وروسته د ګاز له امله د ساه اخیستلو له ستونزې سره مخ شول او په کان کې بند پاتې شول.
وروسته سیمهییزو کانکېندونکو او ژغورونکو د ژغورنې عملیات پیل کړل. د نږدې یوه فعال کان له لارې د هوا په نلونو کې دننه کان ته تازه هوا ورسول شوه، څو د ژغورنې ډلې وکولای شي کان ته ښکته شي.
د ژغورنې ډلې د کان له دننه څخه د محبت الله او رومي محمد په نومونو دوه کارګر مړه وموندل. څلور نور کسان بېهوښه را وایستل شول.
د سیمهییز خبریال فریدالله کاکړ په وینا، بېهوښه شوي کسان د دوکي ولسوالۍ روغتون ته انتقال شول. د درملنې وروسته یې روغتیايي حالت ښه شوی او له روغتون څخه رخصت شوي دي.
د کانونو ادارې اړوند کان تړلی او د پېښې د لاملونو په اړه یې تخنیکي او قانوني څېړنې پیل کړې دي.
بلخوا، د پاکستان لومړي وزیر شهباز شریف په لارښوونه د طبیعي پېښو پر وړاندې د مبارزې ادارې (اینډياېماې) د جولای پر ۳۰مه نېټه کوټې ته څېرمه په یوه جلا کانکېندنې پېښه کې د وژل شویو ۳۴ کانکېندونکو کورنیو ته د مالي مرستې چکونه هم وېشلي دي.
د ادارې د معلوماتو له مخې، هرې کورنۍ ته د ۲۰ لکه پاکستانۍ کلدارو مرسته ورکړل شوې ده. د اینډياېماې ډلې د سیمهییز استازي ډاکټر ابدالله خان په ملتیا د خیبر پښتونخوا په شانګله ولسوالۍ کې د وژل شویو کانکېندونکو له کورنیو سره دغه مرستې وېشلې دي.
د پاکستان حکومت وايي، دغه مالي مرسته د پېښې له زیانمنو کورنیو سره د خواخوږۍ څرګندونه او په لوړ خطر لرونکو برخو کې د کارکوونکو د خوندیتوب د پیاوړتیا هڅه ده.