د پاکستان او ویسټ انډیز ترمنځ د دوو ټېسټ سیالیو لړۍ لومړۍ لوبه نن (شنبې) د ټرېنېډاډ په براین لارا لوبغالي کې پیلیږي.
دا لومړی ځل دی چې په براین لارا لوبغالي کې د ټېسټ کرکټ رسمي سیالي ترسره کېږي. دغه لوبغالی تر دې وړاندې د یو ورځنیو نړیوالو، شل اوریزو نړیوالو او کورنیو فرسټ کلاس سیالیو کوربه پاتې شوی و.
ویسټ انډیز د سریلانکا پر وړاندې د خپلې وروستۍ ټېسټ لړۍ تر بریا وروسته له ښه باور سره دې سیالۍ ته راځي. د روسټن چېس په مشرۍ لوبډلې هغه لړۍ په خپل نوم کړې وه او تمه کېږي چې نوموړی به د ګوتې له ټپ وروسته د لومړۍ ټېسټ لوبې لپاره چمتو وي.
بل لور ته پاکستان د بنګلهدېش پر وړاندې د وروستۍ ټېسټ لړۍ تر ماتې وروسته له نوې مشرۍ سره میدان ته ښکته کېږي. د غوراوي کمېټې بابر اعظم یو ځل بیا د ټېسټ لوبډلې د کپتان په توګه ټاکلی او لوبډله به د خپلو وروستیو کمزورو پایلو د ښه کولو هڅه وکړي.
د دواړو لوبډلو ترمنځ وروستۍ ټېسټ لړۍ په ۲۰۲۵ کال کې د ملتان په ښار کې شوې وه چې ۱-۱ مساوي پای ته رسېدلې وه، او په ۲۰۲۱ کال کې هم په کیریبین کې د دواړو لوبډلو ټېسټ لړۍ ۱-۱ مساوي شوې وه.