د افغانستان کرېکټ ملي لوبډلې د زېمبابوې پر وړاندې په دویمه شل اوریزه سیالۍ کې د ۱۹ منډو په توپیر بریا خپله کړه او په دې توګه یې د درېیو لوبو لوبلړۍ هم وګټله.
د لوبې پچه زېمبابوې وګټله او افغانستان ته یې د لومړۍ توپوهنې بلنه ورکړه. افغان لوبډلې د لوبې په پیل کې له سخت حالت سره مخ شوه او خپلې لومړنۍ څلور وېکټې یې یوازې د پنځو منډو په بدل کې له لاسه ورکړې.
خو عظمت الله عمرزي او اعجاز احمدزي په ګډه د لوبې بهیر بدل کړ او لوبډلې ته یې د سیالۍ وړ منډې برابرې کړې.
عظمت الله عمرزي په زړه پورې توپوهنه وکړه او په ۶۷ توپونو یې ۱۱۶ منډې جوړې کړې. نوموړي په خپله پاڼۍ کې ۱۲ شپږیزې او پنځه څلوریزې ووهلې او د افغانستان لومړنۍ شل اوریزه سلیزه یې ثبت کړه. هغه خپله پنځوسیزه په ۳۱ توپونو او سلیزه په ۴۴ توپونو بشپړه کړه.
اعجاز احمدزي ۵۲، راشد خان ۲۵ او صدیق الله اتل ۱۷ منډې وکړې. په دې توګه افغانستان زېمبابوې ته د ټاکلي هدف د پوره کولو لپاره ستونزمن کار پرېښود.
د زېمبابوې په توپ اچوونکو کې برډ اېونز او کونډای مټيګیمو دوه ـ دوه وېکټې واخیستې، په داسې حال کې چې اېنېسټ مسوکو، وېنسېنټ مسیکیسـا او سکندر رضا یوه ـ یوه وېکټه ترلاسه کړه.
د هدف د دفاع پر مهال افغان توپ اچوونکو هم اغېزناکه لوبه وکړه. عبدالله احمدزي دوه وېکټې واخیستې، په داسې حال کې چې فرید احمد، عظمت الله عمرزي او راشد خان یو ـ یو لوبغاړی وسوځاوه. زېمبابوې ونه توانېده چې ټاکلی هدف پوره کړي او لوبه یې د ۱۹ منډو په توپیر وبایلله.
عظمت الله عمرزی د خپلې پیاوړې توپوهنې او یوې وېکټې اخیستو له امله د لوبې غوره لوبغاړی ونومول شو. د نوموړي سلیزه په شل اوریزو نړیوالو سیالیو کې لومړنۍ سلیزه وه. له دې سره په نړیوالو شل اوریزو لوبو کې د هغه د ټولو منډو شمېر هم له زرو واوښت.
عمرزی چې په یو ورځنیو نړیوالو سیالیو کې د الراونډرانو په درجهبندۍ کې لومړی ځای لري، په داسې حال کې توپوهنې ته راغی چې د افغانستان پنځه لوبغاړي یوازې د ۳۸ منډو په جوړولو سوځېدلي وو.
افغانستان په دې لوبلړۍ کې د ابراهیم ځدراڼ په لوبډلمشرۍ لوبه وکړه. په لوبډله کې رحمان الله ګوربز، صدیق الله اتل، محمد اکرم، شاهدالله کمال، اعجاز احمدزی، عظمت الله عمرزی، راشد خان، مجیب الرحمن، عبدالله احمدزی او فرید ملک هم شامل وو.
د یادونې وړ ده چې راشد خان په لومړۍ سیالۍ کې د دوو وېکټو اخیستو او ۳۰ منډو جوړولو له امله د لوبې غوره لوبغاړی اعلان شوی و. په هماغه لوبه کې اعجاز احمدزي ۵۲ او شاهدالله کمال ۴۶ منډې کړې وې.
د افغانستان لوبډلمشر ابراهیم ځدراڼ له لومړۍ لوبې وروسته د راشد خان او اعجاز احمدزي د لوبو ستاینه کړې وه او ویلي یې وو چې لوبډله د ځوانو لوبغاړو پر وړتیا او هڅونې کار کوي.
افغانستان تر دې شل اوریزې لوبلړۍ وړاندې د زېمبابوې او بنګلهدېش پر وړاندې په یو ورځنیو سیالیو کې هم ښې پایلې لرلې دي. افغان لوبډلې خپلې وروستۍ اووه یو ورځنۍ نړیوالې سیالۍ ګټلې دي.
د کرېکټ نړیوالې شورا په درجهبندۍ کې افغانستان د یو ورځنیو سیالیو په نوملړ کې اووم ځای ته پورته شوی او له انګلنډ څخه مخکې شوی دی. د ورکړل شویو شمېرو له مخې، افغانستان ۹۴، انګلنډ ۹۳ او سریلانکا ۹۵ نومرې لري.
ټاکل شوې چې د شل اوریزو سیالیو له پای ته رسېدو وروسته افغانستان او زېمبابوې دوه ټېسټ لوبې هم وکړي. لومړۍ ټېسټ لوبه به د نومبر پر پنځمه او دویمه به د همدې میاشتې پر ۱۳مه نېټه پیل شي.