ویب ډیسک
امریکا وروسته له هغې د طالبانو د کورنیو چارو پر وزیر سراج الدین حقاني ايښې لس میلیونه ډالر جایزه لغوه کړه، چې کابل ته یوه امریکايي پلاوي سفر وکړ.
که څه هم د امریکا بهرنیو چارو وزارت کابل ته په مله پلاوي کې د زلمي خلیلزاد له رسمي رول انکار وکړ، خو د امریکا د یرغمل شویو وګړو استازي، ادم بوهلر د جورج ګلیزمن په نوم امریکايي وګړی د طالبانو له بند آزاد کړ.
د طالبانو بهرنیو چارو وزارت د ګلیزمن آزادېدل داسې مهال د امریکا لپاره د «ښه نیت» په موخه وبلل، چې د نیویارک ټایمز د یوه راپور او تحلیل له مخې، د طالبانو او امریکا تر منځ «معاملاتي ډیپلوماسي» پیل شوې ده.
د راپور له مخې، د امریکايي بندیانو خوشې کول او په بدل کې یې د طالبانو د حقاني شبکې پر مشر او د یادې ډلې د کورنیو چارو پر وزیر ايښې جایزې لغوه کول د «معاملاتي ډيپلوماسۍ» پیل دی.
د امریکا عدالت لپاره انعام او فدالي څېړنو ادارو (FBI) منلې چې د سراج الدین حقاني پر سر ایښې لس میلیونه جایزه یې لرې کړې او نوم یې له دغه لېست ایستلی دی.
د راپور له مخې د طالبانو او امریکا ترمنځ دا «معاملاتي ډیپلوماسي» په نري تار هم تړلې ده.
نیویارک ټایمز د یوه امریکايي چارواکي له قوله ویلي، چې پر حقاني شبکې لګېدلې جایزې لغوه شوې دي، خو ټینګار یې کړی، چې د بندیانو نه خوشې کولو په صورت کې د ټرمپ اداره اختیار لري، څو دا جایزې زیاتې او بیا وضع کړي.
کارپوهان د امریکا او طالبانو وروستیو معاملاتو ته په اشارې وايي، چې دواړه لوري په تدریجي توګه د اړیکو عادي کولو په هڅو کې دي.
د امریکا بهرنیو چارو وزارت داسې مهال د امریکايي بندیانو د خلاصون له امله له طالبانو مننه کړې، چې له دې وړاندې یې په افغانستان کې د داعش سره هم د یادې ډلې مبارزه ستایلې وه.
د امریکا بهرنیو چارو وزیر مارکو روبیو ویلي وو، چې طالبانو ته که په ځينو حالاتو کې داعش سره د مبارزې امر شوی، ډېر ښه یې منلی او مبارزه یې کړې ده.
که څه هم د امریکا او طالبانو په اړیکو کې د عادي کېدو د څرک راپورونه ورکول کېږي، خو تراوسه د نړۍ هېڅ هېواد طالبانو سره په ښکاره توګه رسمي اړیکې نه دي پیل کړي.
# #Afghanistan #US #FBI #Doha
