ويب ډيسک
د هند کرېکټ ملي لوبډلې روزونکي راهولډراوېډ په خبري ناسته کې ویلي، چې « افغان لوبډلې په روان نړیوال جام کې خپله وړتیا وښودله او دا داسې لوبډله نه ده، چې موږ یې اسانه وګڼو»
راهول د افغان لوبډلې ستاینه کړې او زیاته کړې یې ده، چې یو شمېر افغان لوبغاړي په آیپياېل او نورو لیګونو کې له هندي لوبغاړو زیاته تجربه لري.
افغانستان به د اتو غوره لوبډلو په پړاو کې نن د کابل پر مهال ماښام ۷ بجې په ویسټ اینډیز کې د هند پر وړاندې د سیالۍ ډګر ته ښکته شي.
افغانستان په ګروپي پړاو کې یوګاندا، نیوزیلینډ او پاپوانیوګیني ته ماتې ورکړه، خو تېره دوشنبه یې د ویسټ اینډیز په وړاندې ماتې ومنله.
د افغانستان بله سیالي راتلونکې شنبه د اسټرالیا او د سې شنبې په ورځ د بنګلهدېش پر وړاندې ده.
***
