د سعودي عربستان حکومت د امریکا له لوري دغه هېواد ته د F-35 جنګي الوتکو د احتمالي پلور له وړاندیزه هرکلی کړی او دا یې د دواړو هېوادونو ترمنځ د دفاعي او امنیتي همکاریو د پراختیا مهم ګام بللی دی.
په واشنګټن کې د سعودي سفارت ویلي، د F-35 الوتکو د پلور وړاندیز د سعودي عربستان او امریکا ترمنځ د اوږدمهاله ستراتېژیکې ملګرتیا او دفاعي همکاریو د پیاوړتیا څرګندونه کوي.
د امریکا د بهرنیو چارو وزارت د شاوخوا ۲۴.۳ میلیارد ډالرو په ارزښت د وسلو د احتمالي پلور منظوري ورکړې چې پکې ۴۸ د F-35A جنګي الوتکې هم شاملې دي. په وړاندیز کې د الوتکو انجنونه، مخابراتي او برېښنايي وسایل، روزنیز سیستمونه، سافټویر، پرزې او لوژستیکي خدمتونه هم شامل دي.
خو دا لا وروستۍ معامله نه ده. د پلور وړاندیز باید د امریکا د وسلو د پلور له قانوني پړاوونو او د کانګرس له ارزونې څخه تېر شي.
F-35 د پنځم نسل څو موخیزه جنګي الوتکه ده چې د پټې الوتنې، پرمختللو حسکو او خوندي مخابراتي سیستمونو وړتیاوې لري. سعودي عربستان د دې الوتکې F-35A ډول غوښتنه کړې، چې د عادي ځمکنۍ ناستې او الوتنې لپاره کارېږي.
اوس مهال د سعودي هوايي ځواک په بېړۍ کې د امریکا F-15 او د اروپا جوړې ټورنېډو او یوروفایټر ټایفون الوتکې شاملې دي. د F-35A احتمالي ترلاسه کول به د سعودي هوايي ځواک لپاره د پنځم نسل جنګي الوتکو د کارولو زمینه برابره کړي.
په منځني ختیځ کې اسرائیل تر اوسه یوازینی هېواد دی چې F-35 الوتکې کاروي. د دې الوتکو د کاروونکو په ډله کې د امریکا ترڅنګ د اروپا، اسیا او نورو سیمو یو شمېر هېوادونه هم شامل دي.
د امریکا د بهرنیو چارو وزارت وايي، د دغه احتمالي پلور موخه د سعودي عربستان د هوايي دفاع او د ګواښونو پر وړاندې د مقابلې وړتیا پیاوړې کول او له امریکايي او سیمهییزو ځواکونو سره د ګډو عملیاتو وړتیا لوړول دي.