ويب ډيسک
د ایران پریس ټي وي خبر ورکړی چې د اسرائيلي رژيم له لوري د ايران پر ښارونو د پرلهپسې بريدونو وروسته، د پرون ورځې د غچ اخیستنې بريد په ترڅ کې د اسلامي انقلاب سپاه پاسداران (IRGC) يو ځل بيا اسرائيل ته سخت ځواب ورکړ او د دوی هوايي دفاعي سيستمونه يې شرمنده کړل.
د جمعې په ماښام، ايران د اسرائيل د هوايي بريدونو په غچ کې چې د ايران پر اتومي، پوځي او ملکي زيربناوو شوي وو، د صهیونیسټ رژيم پر پوځي اډو او نورو تاسيساتو په تل ابیب کې توغندي وويشتل.
دا بريد د اسرائيلي رژيم لپاره حيرانوونکی و، ځکه ډېرو شنونکو اټکل کاوه چې ايران به څو ورځې وخت ونيسي تر څو د خپل پوځ مشرتابه بيا سره منظم کړي او ښايي د ځنډ له لارې اسرائيلي رژيم په تشويش او ګنګس حالت کې وساتي.
خو دا ځنډ ونشو، او لکه څنګه چې د ايران د مشر آيت الله سيد علي خامنهاي او نورو لوړپوړو چارواکو له خوا اعلان شوی و، ايران تېره شپه د بالستيک توغنديو په څو پړاوونو کې بريد وکړ.
د ايران اصلي بريد چې “سخته سزا عملیات” يا “وعده صادقه ۳” نومول شوی و، د ماسپښين لخوا د لږ تر لږه سل کاميکازه ډرونونو په توغولو پيل شو، چې هدف يې د دښمن الوتکې او د هوايي دفاعي توغنديو زېرمې وې.
د شپې بريد کې لسګونه بالستيک توغندي استعمال شول، چې لږ تر لږه پنځه مهم اهداف يې په اشغال شوې فلسطيني خاوره کې وويشتل، په دې کې دوه هوايي اډې، دوه اتومي تاسيسات، او د رژيم د پوځ او استخباراتو يو مهم کمپلکس شامل وو.
دغه بالستيکي بريد څو اسرائيلي تبليغاتي ادعاوې رد کړې، لکه دا چې ګواکې د ۲۰۲۴ د اکتوبر د بريد په ترڅ کې يې د ايران د بالستيکي پروګرام ملا ماته کړې، يا دا چې د بندر عباس چاودنه د اصلي توغندیو سونګ توکي نه وو، او يا دا چې دوی خپل هوايي دفاعي سيستم “نه نفوذېدونکی” کړی دی.
لکه څنګه چې په تېرو دوو مواردو کې هم وشول، ايران يو ځل بيا خپله نظامي او تخنيکي وړتیا وښوده او د اسرائيلي رژيم تر ټولو مهمو سياسي، پوځي او اتومي اهدافو ته د هوايي دفاع له سیوري لاندې ځان ورساوه.
هدف شوي ځایونه کې شامل دي: د تل نوف هوايي اډه (د تل ابیب سره نېږدې)، د نواتيم هوايي اډه (په نیګیو صحرا کې چې F-35 الوتکې پکې ساتل کېږي)، د ديمونا اتومي تاسيسات، د تل ابیب اتومي څېړنيز مرکز، او د کريه سيمه (چې د اسرائيلو “پينټاګون” بلل کېږي).
ټول دا پنځه مهم هدفونه د پرون ورځې Press TV له خوا په دقيقه توګه مخکې له بريده وړاندويني شوي وو.
د اسرائيلي رژيم هڅه دا وه چې د ايران د بريدو بريا پټه وساتي او د مېشتو خلکو نه يې وغوښتل چې د بريد انځورونه او ويډیوګانې په ټولنیزو رسنيو مه خپروئ، خو دا هڅه ناکامه شوه.
په ټولنیزو رسنيو کې ګڼ شمېر راپورونه خپاره شول، چې پکې د فوکس نيوز د يو خبریال راپور ډېر مهم و، چې د کريه په سيمه کې د اسرائيلي د جنګ وزارت د پراخې ویجاړۍ راپور يې ورکړ.
د پوځ د قومندانانو راپور ښيي چې ايران شاوخوا ۱۵۰ ستراتیژیک اهداف په نښه کړي. د سپاه عمومي قومندان لوی درستيز محمد پاکپور وويل: “موږ به د صهیونيسټانو پرمخ د دوزخ دروازې پرانيزو.”
د سپاه قومندان ته سلاکار، بريد جنرال احمد وحيدي، دغه غچي عملیات بريالي وبلل او د هدف شويو ځایونو يادونه يې وکړه: “تل نوف او نواتيم هوايي اډې د ايران د بالستيک توغنديو له خوا وويشتل شوې؛ د جنګ وزارت او د رژيم صنعتي او پوځي مرکزونه په تل ابیب کې هم په نښه شول.”
هغه زياته کړه: “د اسرائيلي پوځ تېروتنه دا وه چې زموږ پر بنسټيزو تاسيساتو يې بريد وکړ. زموږ د عملیاتو پلان جوړوونکو شاوخوا ۱۵۰ هدفونه ټاکلي وو، چې دا هدفونه په څو پړاوونو کې په برياليتوب سره وويشتل شول.”
له میداني سرچينو راپورونه وايي چې په تل ابیب کې د ايران د توغنديو بریدونو له امله پراخې ویجاړۍ رامنځته شوې. يو صهيوني مېشت سړی وايي: “ايران په هغه شپه هر څه چې يې غوښتل، په تل ابیب کې په توغنديو وويشتل.”
په اشغال شويو سيمو کې د امريکا سفير هم سختې شېبې تېری کړې، هغه وويل: “تل ابیب يوه سخته شپه تېره کړه؛ ما پنځه ځله د شپې پټنځای ته پناه يووړه.”
د ايران بالستيکي برید د اسرائيلي کروز توغنديو او کوچنیو ډرونونو تر بريدونو ډېر سخت فزيکي او روحي تاثير درلود، ځکه چې د ايران توغندیو سرګلولې له نيم ټنه تر يو ټنه وزن لري.
د ايران پوځ سرچينو له مخې، کارول شوی توغندی “خيبر شکن” و، يو جامد سونګلرونکی، منځواټن بالستيک توغندی دی، چې د مانور وړ سرګلولې او د هوايي دفاعي سيستمونو د غولولو توان لري.
د دې توغندي واټن ۱۴۵۰ کیلومتره دی او د چټکو او دقيقو بریدونو لپاره طراحي شوی. دا بریدونه د اسرائيل او امريکا ګډو څو پوړيزو هوايي دفاعي سيستمونو، لکه د ډېوېډ سلېنګ، ارو، پاتریوت او THAAD له خوا ودروي نه شول.
بل لور بي بي سي راپور کې راغلي د ايران او اسرائيل تر منځ تېره شپه د توغنديو او هوايي بریدونو تبادله روانه وه. د شپې د پېښو لنډيز او تر دې دمه تازه وضعيت دا دی:
د اسرائيل دفاعي ځواکونو تېره شپه ناوخته اعلان وکړ چې هغوی پر تهران هوايي بریدونه کړي، او د ايران د اټومي پروګرام سره تړلي ځینې ودانۍ يې په نښه کړي دي، چې د دفاع وزارت هم پکې شامل دی.
له ايران څخه بيا يو ځل پر اسرائيل توغنديز بريد شوی، او د ايران دولتي تلويزيون د پراخو ډرون بريدونو خبر ورکړی. د اسرائيل د مرکزي سيمو څخه د چاودنو غږونه اورېدل شوي دي.
د ايران د نفتو وزارت ويلي، چې اسرائيل د شېراز د تېلو زېرمې او په تهران کې د تېلو ټانکرونه په نښه کړي، خو زياتوي چې “اوس حالات تر کنټرول لاندې دي.”
بی بی سی د يوې ويډیو تصديق کړی چې پکې د ايران د توغنديز بريد وروسته د اسرائيل د حیفا ښار يو تېل تصفيهکوونکی مرکز په اور کې ښکاري.
تر دې وړاندې د ايران دولتي تلويزيون اعلان کړی و چې له ۱۰۰ زيات توغندي يې پر اسرائيل، په ځانګړي ډول تل ابیب او حیفا، توغولي دي.
د اسرائيلو بېړنۍ مرستندويه ادارې د يوې ښځې د وژل کېدو تصديق کړی، او وايي تر اوسه اووه تنه ټپيان روغتون ته وړل شوي دي.
