د سوېلي وزیرستان ښکته ولسوالۍ اوسېدونکو د واڼا ـ ګومل زم سړک د خراب او ویجاړ حالت له امله ژوره اندېښنه څرګنده کړې او ویلي یې دي چې دغه مهمه سوداګریزه او ترانسپورتي لاره نږدې د تګ راتګ وړتیا له لاسه ورکړې ده.
یاد سړک نه یوازې واڼا له ګومل زم سره نښلوي، بلکې د انګور اډې له لارې د پاکستان او افغانستان ترمنځ د سوداګرۍ او تګ راتګ مهمه لاره هم بلل کېږي. خو د کلونو بېپامۍ، د زیربناوو زیانونو او پرلهپسې بارانونو او سېلابونو دغه لاره له جدي ستونزو سره مخ کړې ده.
ځايي اوسېدونکي وايي چې د سړک پر اوږدو ژور کندې، خټې، ماتې برخې او ناپخې سیمې رامنځته شوې دي چې سفر یې ستونزمن او خطرناک کړی دی. همدارنګه، یو شمېر پلونه او د اوبو ویالې هم زیانمنې شوې دي.
د احمدزي وزیر قوم مشرانو ویلي چې د سړک د بیارغونې لپاره پخوا بودیجه ځانګړې شوې وه، خو وروسته دغه پروژه د ولایتي پراختیايي پروګرام څخه وایستل شوه او د رغونې چارې ودرېدې، چې له امله یې سړک لا ډېر خراب شو.
بلخوا د مخابراتو او عامه ودانیو ریاست مسئول اکرام وزیر منلې چې د سختو بارانونو، ناڅاپي سېلابونو او ځمکې ښوېدنو له کبله سړک سخت زیانمن شوی او د تګ راتګ لپاره مناسب نه دی پاتې.
نوموړي ویلي چې د سړک د بشپړې بیارغونې لپاره تخنیکي طرحه چمتو او پېښور ته لېږل شوې ده. د ده په وینا، د پروژې اټکلي لګښت شاوخوا ۲۵ میلیارده پاکستانۍ روپۍ دی او عملي کار به یې د بودیجې له منظورېدو وروسته پیل شي.
وروستیو بارانونو ستونزې لا پسې زیاتې کړې دي. د ځمکې ښوېدنو له امله په بېلابېلو برخو کې تګ راتګ بند شوی او مسافر ساعتونه ساعتونه په لاره کې بند پاتې شوي دي.
سوداګر او موټرچلوونکي وايي چې د سړک خرابوالي د سیمې پر بازارونو او د افغانستان او پاکستان ترمنځ پر سوداګرۍ منفي اغېز کړی دی. د دوی په وینا، ګڼ شمېر باروړونکي موټر اړ شوي چې اوږدې بدیلې لارې وکاروي، چې له امله یې لګښتونه او د توکو د لېږد وخت زیات شوی دی.
د سیمې قومي مشران او سیاسي استازي له فدرالي حکومت څخه غواړي چې د سړک بیارغونې ته ځانګړې بودیجه ورکړي او د دې مهمې اقتصادي لارې د ژغورلو لپاره بېړني ګامونه پورته کړي.
