ویب ډیسک
پېښور نه د عوامي نېشنل ګوند پخوانۍ د صوبایي اسمبلۍ غړې او د ګوند صوبایي اطلاعاتو پخوانۍ سیکرټره ثمر هارون بلور د مسلم لیگ (ن) سره یوځای شوه.
پېښور… د دې ښار په سیاست کې یوه مهمه بدلون هغه وخت راغله، کله چې د صوبایي اسمبلۍ پخوانۍ غړې او د عوامي نېشنل ګوند پخوانۍ د اطلاعاتو سیکرټره، ثمر هارون بلور، د مسلم لیگ (ن) سره یوځای کېدل اعلان کړل.
د سرچینو له مخې، دا پرېکړه هغې د وزیراعظم شهباز شریف سره د لیدنې پر مهال وکړه. په دې ناسته کې د وفاقي وزیر، امیر مقام، ګډون هم موجود و.
وزیراعظم شهباز شریف د ثمر بلور شمولیت ته د خوښۍ څرګندونه وکړه او وې ویل چې د هغې راتګ به په خیبر پښتونخوا کې د مسلم لیگ (ن) پوزیشن نور هم قوي کړي.
ثمر بلور د بلور کورنۍ غړې ده. د هغې مېړه، هارون بشیر بلور، د عوامي نېشنل ګوند یو نومیالی او شهید شوی مشر و، چې د انتخاباتي کمپاین پر مهال د ترهګر برید ښکار شو.
د خپل مېړه د شهادت وروسته، ثمر بلور په ۲۰۱۸م کال کې د ضمني انتخاباتو برخه واخیسته او بریالۍ شوه. دا بریا د خیبر پښتونخوا په اسمبلۍ کې د یوې ښځې لپاره یو تاریخي ګام و، ځکه چې هغه لومړۍ ښځه شوه چې د عامو خلکو له لارې مستقیمه وټاکل شوه.
دا بریا د پېښور ښار لپاره هم ځانګړې وه، ځکه چې له ۱۶ کلونو وروسته کومه ښځه وکولای شوه له دې ښار څخه د عامو خلکو په ووټ اسمبلۍ ته ولاړه شي.
ثمر بلور له ۲۴ اکتوبر ۲۰۱۸ نه تر ۱۸ جنورۍ ۲۰۲۳ پورې په اسمبلۍ کې فعال رول لوبولی.
په جون ۲۰۲۰ کې هغې ته د عوامي نېشنل ګوند د صوبایي اطلاعاتو سیکرټره چوکۍ ورکړل شوه.
د ثمر بلور د سیاسي وابستګۍ دا بدلون، په خیبر پښتونخوا کې د سیاست پر چاپېریال ژور اغېز لرلای شي، ځکه چې هغه نه یوازې د بلور کورنۍ استازې ده، بلکې د ښځو سیاست ته یې هم ځانګړی حیثیت ورکړی.
