کاسا-۱۰۰۰ پروژه په افغانستان کې د انرژۍ له مهمو سیمهییزو پروژو څخه شمېرل کېږي، چې موخه یې د منځنۍ اسیا او جنوبي اسیا ترمنځ د برېښنا لېږد اسانه کول دي. دا پروژه د ۱۳۰۰ مېګاواټه برېښنا د انتقال وړتیا لري او د اقتصادي همکارۍ، انرژۍ تبادلې او سیمهییزو اړیکو د پیاوړتیا لپاره یو مهم ګام بلل کېږي.
د دې پروژې اساسي هدف دا دی چې د قرغزستان او تاجکستان اضافي برېښنا د افغانستان له لارې پاکستان او د جنوبي اسیا نورو هېوادونو ته ولېږدول شي. د پروژې په عملي کېدو سره به نه یوازې د سیمې د انرژۍ اړتیاوې تر یوه بریده پوره شي، بلکې د ګډونوالو هېوادونو ترمنځ اقتصادي اړیکې به هم پراخې شي.
کاسا-۱۰۰۰ پروژه په افغانستان کې په درېیو پړاوونو کې روانه ده. لومړی پړاو چې ۱۹۷ کیلومتره اوږدوالی لري، د ۲۰۲۴ کال په ډسمبر میاشت کې بېرته پیل شو. دا برخه له شیرخان بندر څخه تر ده صلاح ولسوالۍ پورې غځېدلې او ۵۶۴ د برېښنا لېږد ستنې پکې شاملې دي.
دویم پړاو ۱۹۶ اعشاریه ۴ کیلومتره اوږد دی او ۵۸۷ ستنې پکې جوړېږي. دغه مسیر د بغلان، پنجشېر او کاپیسا ولایتونو له لارې تېرېږي. درېیم پړاو بیا ۱۸۸ اعشاریه ۴ کیلومتره اوږدوالی لري او ۵۶۲ ستنې پکې شاملې دي. دا برخه له کاپیسا، کابل، لغمان او ننګرهار ولایتونو تېرېږي او د تورخم تر پولې رسېږي، له هغه ځایه به برېښنا جنوبي اسیا ته ولېږدول شي.
د افغانستان د برېښنا ملي شرکت (برشنا) د معلوماتو له مخې، په هېواد کې د کاسا-۱۰۰۰ پروژې شاوخوا ۸۰ سلنه چارې بشپړې شوې دي. چارواکي وایي چې پاتې ساختماني کارونه هم په چټکۍ روان دي او د پروژې له بشپړېدو وروسته به افغانستان ته د پام وړ اقتصادي ګټې ورسېږي.
اقتصادي شنونکي وایي، افغانستان به د یوه ترانزیټي هېواد په توګه له دې پروژې څخه هر کال شاوخوا ۶۰ میلیونه ډالر عاید ترلاسه کړي. سربېره پر دې، پروژه به د هېواد د برېښنايي زیربناوو په پیاوړتیا، د کارموندنې په زیاتوالي او د سیمهییز اقتصادي یووالي په پراختیا کې هم مهم رول ولوبوي.
د کارپوهانو په باور، کاسا-۱۰۰۰ یوازې د برېښنا د لېږد پروژه نه ده، بلکې د منځنۍ او جنوبي اسیا ترمنځ د همکارۍ، ثبات او پرمختګ یو مهم پل هم ګڼل کېږي. د دې پروژې بریالۍ بشپړېدل به د انرژۍ د رسولو بهیر پیاوړی کړي، اقتصادي فعالیتونه به زیات کړي او د ګډونوالو هېوادونو ترمنځ به د باور او همکارۍ فضا لا نوره هم پیاوړې کړي.
کاسا-۱۰۰۰ د راتلونکو سیمهییزو انرژۍ پروژو لپاره یوه بېلګه بلل کېږي، چې کولی شي د سیمې هېوادونه د ګډې ودې او دوامدار اقتصادي ثبات پر لور رهبري کړي.
