د ازبکستان د سوداګرۍ او صنایعو خونې مشر، داورون وهابوف، ویلي چې د روان کال په لومړیو څلورو میاشتو کې افغانستان ته د دغه هېواد صادرات ۵۵۰ میلیونه ډالرو ته رسېدلي دي.
وهابوف ویلي چې افغانستان د ازبکستاني توکو لپاره د پراخېدونکي بازار بڼه خپله کړې ده. د راپور له مخې، د سږ کال په جنورۍ میاشت کې له ازبکستان څخه افغانستان ته میاشتني صادرات له ۱۱۷ میلیونه ډالرو څخه د اپرېل په میاشت کې ۱۶۰ میلیونه ډالرو ته لوړ شوي دي.
راپور زیاتوي چې د صادراتو یوه لویه برخه خوراکي توکي دي. یوازې د خوراکي موادو صادرات ۱۳۸ میلیونه ډالر ښودل شوي، چې پکې د نباتي غوړیو، هګیو او ژوندیو چرګانو صادرات زیات شوي دي.
ازبکستاني چارواکي وایي، د دواړو هېوادونو ترمنځ د سوداګرۍ د پراختیا لپاره هڅې روانې دي او تمه ده چې د کال تر پایه د راکړې ورکړې کچه نوره هم لوړه شي.
